Umunyamabanga Nshingwabikorwa w’Umurenge wa Murunda, Raphael Reberaho, yemeza ko ubwo bwicanyi bwabaye mu ijoro ryo ku wa gatandatu 04 Nyakanga 2015, Uwimana agafatwa na Polisi ku cyumweru ubwo yageragezaga gutoroka.

Yagize ati “Uwo mugabo yishe umugore we wa kabiri amushinja uburozi ngo aha abana b’umugore mukuru bashakanye ariko nta gihamya kigaragaza ko yabaroze.”

Umunyamabanga nshingwabikorwa akomeza avuga ko bishobora ahubwo byaratewe n’ubusinzi kuko n’abaturage ngo nta gihamya batangaza bavuga ko uwo nyakwigendera aroga abana ba mukeba we.

Umuvugizi wa Polisi mu Ntara y’Iburengerazuba Spt Emmanuel Hitayezu avuga ko ubwicanyi nk’ubu bubabaza kuko ngo akenshi buturuka ku ihohoterwa ribera mu ngo akaba asaba abashakanye kwirinda iryo hohoterwa kandi bakirinda guharikana kuko akenshi biba intandaro y’amakimbirane.

Akomeza avuga binyuze mu ishami rya Polisi rishinzwe kurwanya ihohoterwa rishingiye ku gitsina begera abaturage bakabigisha kugira ngo ihohoterwa ricike.

Uwimana wishe Uzamukunda n’umwana we, bari bafitanye abana 4 harimo 2 babyaranye n’abandi babiri umugore yashakanye.

Mbarushimana Cisse Aimable