Iyi mpanuka yabaye mu masaha ya saa mbili za mu gitondo mu kiyaga cya Kivu ahitwa ku Iriba. Yabaye ubwo ubwato bw’ibiti butari ubwa moteri, bwarohamaga, Nyiranteziryayo ahita yitaba Imana; nk’uko umunyamabanga nshingwabikorwa w’akagari ka Remera, Ntirenganya Yohani yabitangaje.

Ubu bwato bwari butwawe n’uwitwa Elias ndetse na Ntahomvukiye Yohani, bwerekezaga mu murenge wa Musasa uhana imbibe n’uyu murenge wa Boneza.

Nyuma yo kumenya iby’iyi mpanuka, Umunyamabanga nshingwabikorwa w’umurenge wa Boneza, Déo Rutayisire, yagiranye inama y’igitaraganya yamuhuje n’abayobozi b’inzego z’ibanze.

Rutayisire yasabye abaturage kwirinda amato y’ibiti adakoreshwa na moteri kuko atemerewe gukoreshwa mu kiyaga cya Kivu, kuko abangamiye umutekano w’abantu n’ibintu.

Julienne Nyiranteziryayo witabye Imana, yari afite imyaka 33 y’amavuka, akaba yari mwene Ndereyehe na Nikobahoze, yari yarashakanye na Nzabamwita Elias, akaba asize abana bane babyaranye.

Védaste Nkikabahizi