Bivugwa ko kuwa 13/11/2014 ahagana mu masaha ya saa yine z’amanywa aribwo Niyitegeka yafashe ku ngufu uyu mukobwa w’imyaka 19 wiga mu rwunge rw’amashuri rwa Murunda mu mwaka wa 5.

Uyu mukobwa tutatangaje amazina ye avuga ko yageze hafi y’akagari uyu mugabo ayobora akamuhamagara amubwira ko amushaka mu rugo umukobwa nawe ntiyamuhakanira, bageze yo nibwo gitifu yamusabaga kuryamana nawe umukobwa aranga ariko ku mbaraga biza kurangira amusambanyije ku ngufu.

Bikimara kuba ngo Niyitegeka yahise asohoka asiga akingiranye wa mukobwa agaruka kumukingurira mu masaha ya sa sita z’amanywa, maze ahita ajya kureba umuyobozi w’umudugudu amwereka ingorane yahuye nazo ndetse anamugaragariza n’uburyo imyenda yari yambaye yacikaguritse.

Hanyurwimfura Etienne uyobora umudugudu wa Murambi yemeje ko yatabajwe n’uwo mukobwa ariko ngo agezeyo Gitifu aramuhakanira.

Agira ati “Nibyo koko umwana yarantabaje ahagana mu masa sita ambwira ko gitifu amusambanyije atabishaka ndagenda ariko Gitifu arampakanira”.

Uyu mwana w’umukobwa ubusanzwe akomoka mu murenge wa Murunda ari naho iwabo batuye ariko akaba yari aje gusinya ku mpapuro z’urukiko mu mwanya wa nyina kuko ngo yari arwaye, nibwo yafatwaga ku ngufu nk’uko we abyitangariza.

Uyu mugabo ukekwaho gufata umwana w’umukobwa ku ngufu afungiye kuri sitasiyo ya polisi ya Kayove mu murenge wa Ruhango.

Mbarushimana Aimable