Ubwo bujura bumaze iminsi ariko uko iminsi igenda niko bugenda bukaza umurego, ubu insinga z’amashanyarazi zigeza umuriro ku kibuga cy’indege cya Kamembe zaribwe kuburyo hashize iminsi nabo bari mu kizima kugeza ubu amatara yo ku muhanda ntacana.

Buri joro usanga hari ahantu hibwe insinga kandi ngo hari isoko ryabonetse ariko ritazwi ry’abacuruzi b’ibyuma aho ngo ikilo kimwe kigura amafaranga 1000.

Umuyobozi wa EWSA ishami rya Rusizi, Kaberuka Desire, yatangaje ko kwiba insinga z’amashanyarazi bikurura ingaruka nyinshi kandi zikomeye harimo gusiga izo baciyemo zishinyitse bikaba byakurura ipfu z’abantu muburyo butunguranye.

Harimo kandi gutakaza iterambere ry’ikwirakwizwa ry’amashanyarazi ibyo kandi bikaba bihobya igihugu akaba ari muri urwo rwego asaba abayobozi binzego z’ibanze gufatanya kurinda umutekano w’insinga kugirango barusheho gutera imbere.

Kabera Desire yavuze ko nta nsinga z’amashanyarazi zihari kuburyo ngo zajya zihora zisimbura izibwe.

Nk’uko byagarutsweho mu nama y’umutekano y’akarere ka Rusizi ngo impamvu abajura bakomeza kwiba muri aka karere ngo biva ku muco wo kutabahana bihagije aho ngo bafatwa bakongera kurekurwa nta n’icyo batanze.

Ngo bitewe nuko ari nta tegeko rihana abajura ngo bituma barushaho kororoka akaba ari muri urwo rwego EWSA yifuza ko n’inzego z’umuteno zahagurukira icyo kibazo mu rwego rwo kurengera ibikorwa remezo.

Musabwa Euphrem