Abahigi b’Abanyekongo bafite imikumbi y’ibwa n’amacumu ngo bakomeje kugaragara hirya no hino mu mirenge iri mu igiturage nko muri Nkanka na Mururu.

Umuyobozi w’akarere ka Rusizi afatanyije n’inzego z’umutekano basabye abanyamabanga nshingwabikora gucunga imirenge yabo kuko ngo batarebye neza ibyo bita guhiga byavamo ibibazo kuko ngo nta n’icyemeza ko aba Banyekongo baba baje guhiga koko nkuko abaturage babyibwira dore ko baba basize amashyamba manini y’iwabo.

Usibye kuba aba Banyekongo baza guhiga mu Rwanda batabyemerewe ngo nta n’ibyangombwa by’inzira bibanyuza ku mipaka baba bafite bivuga ko bakora amakosa yo kuvogera igihugu banyuze mu inzira za magendo.

Ubwo baheruka gufatwa bavuze ko ngo batari bazi ko guhiga mu Rwanda bibujijwe aho ngo iwabo guhiga inyamaswa mu mashyamba bifatwa nk’umuco kuko bitunze imiryango.

Ingamba zafashwe ni uko abazongera gufatwa bazashikirizwa inzego z’ubuyobozi bwa Leta mu karere byaba ngombwa ubuyobozi bw’akarere bugahamagara abayobozi ba Congo bakabasobanurira amakosa abaturage babo bakora bavogera igihugu mu buryo butemewe n’amategeko bakongera kubirengaho bagahanwa n’amategeko.

Musabwa Euphrem