Umuturage witwa Nakure Delphine yagize ati “mu murenge wacu nta hohoterwa rishingiye ku gitsina dukunze guhura naryo, niba rinahari abantu babigira ibanga kandi byaba ari ikibazo gikomeye kuko iyo bibaye ibanga usanga bivuyemo kwicana”.

Abatuye uyu murenge bavuga ko ibibazo bihari kurusha ibindi ari bijyanye n’ubutaka, gusa ngo usanga nabyo bishobora kubyara ihohoterwa rishingiye ku gitsina kuko hari imiryango yanga guha abana b’abakobwa imirima nyamara bakayiha basaza babo.

Ikindi kibazo cyahabonetse ku birebana n’ubutaka ni icy’umuturage witwa Mpagaritswenimana Noheli utuye mu kagari ka Mwumba ,umudugudu wa Gakoma, waguze ubutaka bwa Leta akaba avuga ko atari abizi.

Asaba ubuyobozi ko bwamurenganura kuko ubwo butaka yaguze abona ko agiye kubutakaza, kandi yarabuguze mu buryo bwemewe n’amategeko abantu bareba.

Yagize ati “jyewe naguze ubutaka ntazi ko ari mu kwa Leta hashize iminsi numva abantu bahwihwisa ngo naguze ubutaka bwa Leta nzihombera. Ubwo nabyimye amatwi bigeze aho mbona Agronome araje anyaka impapuro naguriyeho, ambwira ngo nta kintu nemerewe gukorera muri uwo murima”.

Uyu muturage avuga ko kugeza kuri iyi saha nta ho afite abariza, akaba yasababaga ko ubuyobozi bwamurenganura.

Kuri iki kibazo ubuyobozi bw’umurenge bwamubwiye ko burimo kugikurikirana ngo burebe koko niba yaraguze atabizi hanyuma bumusaba kwihangana kuko babirimo kandi bazamufasha bikemuke.

Mu byakunze kugaragara usanga akenshi ari imanza z’amahugu, abayobozi bari bateraniye muri iyo nama basabye abaturage kujya bagerageza bagasobanukirwa n’ibijyanye n’amategeko kuko bakunze kuburana imanza z’amahugu.

Hortense Munyantore