Akarere ka Rubavu ni kamwe mu turere umunani n’Umujyi wa Kigali byinjiye muri gahunda ya Guma mu Rugo izamara iminsi icumi kuva tariki ya 17 Nyakanga 2021, nk’uko byemejwe n’Inama y’Abaminisitiri iherutse guterana.

Ku munsi ubanziriza iyi Guma mu Rugo, abaturage bagaragaye bahaha ku bwinshi ibizabatunga muri iyi minsi 10, bamwe bakavuga ko izabakomerera kuko isanze badafite amafaranga ahagije yo guhaha.

Ku munsi iyi Guma mu Rugo yatangiriyeho, Umunyamabanga Nshingwabikorwa w’Umurenge wa Gisenyi, Tuyishime Jean Bosco, yavuze ko yishimira uko abaturage bitwaye.

Yagize ati "Bitwaye neza, kuko umujyi utuwe n’abaturage ibihumbi bibarirwa muri 40, abantu 160 bakaba ari bo bafashwe batubahirije amabwiriza twabishima, gusa na bo bafashwe bajyanwa muri Sitade kwigishwa kandi barataha."

Tuyishime avuga ko abaturage bafashwe bisobanuraga bavuga ko barimo kujya guhaha.

Ati "N’ubwo kujya guhaha byemewe, si ngombwa ko abaturage bakora urugendo rurerure kandi hari amasoko ari hafi yabo."

Umunsi wa mbere wa Guma mu Rugo mu Karere ka Rubavu ntiwabujije abakora ubucuruzi bwambukiranya imipaka gukora kuko hari ababyemerewe.

Tuyishime agira ati "Hari amabwiriza areba abakora ubucuruzi bwambukiranya imipaka aho bishyira mu matsinda, hakaba abambukana ibicuruzwa n’imodoka abandi bagasigara. Guma mu rugo ni guma mu rugo."

Guma mu rugo iheruka muri 2020 yatumye benshi mu batuye Karere bahura n’inzara, icyakora imiryango itari iya Leta yatanze ubufasha ku babukeneye, ndetse n’ubuyobozi bw’Akarere buvuga ko abazagira ikibazo cyo kubura ibyo kurya bazafashwa.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )