Rotary Mariners yatanze amajaketi 64 yambarwa mu gihe cy’ingendo zo mu mazi yavuze ko yayatanze kugira ngo ashobore gukiza ubuzima bw’abasare bakorera mu mazi badafite izi jaketi kandi bazicyeneye kuko zigabanya impanuka n’imfu mu mazi nkuko byatangajwe na Mastajabu Paul umuyobozi wa Rotary mu Rwanda.

Kabayiza Dieudonne, umwe mu basare bakorera mu kiyaga cya Kivu, ashima ko mbere yo guhabwa iyi myambaro bahuguwe ku mategeko yo gukorera mu mazi yatanzwe na polisi y’u Rwanda na RURA, ariko akavuga ko abasare bacyeneye n’ibindi bikoresho mu kazi bakora birimo ishuri ryigisha abasare, amakarita agaragaza imipaka, radiyo z’itumanaho, ibyapa biyobora abagenzi mu mazi no gushyiraho imyaro izwi.

Umuyobozi mukuru wungirije wa Police, DIGP Stanley Nsabimana, yasinyanye amasezerano y’ubufatanye hagati ya Police y’u Rwanda na Rotary Marines hagamijwe gukumira impanuka zo mu mazi zihitana abantu.

Chief Supretendant Gahima Francis umuvugizi wa polisi mu ntara y’uburengerazuba akaba n’umugenzacyaha ashima iki gikorwa cyo kugenera Jaketi abasare bakorera mu kiyaga cya Kivu kuko bizagabanya umubare w’imfu z’abagwa mu mazi ariko akavuga ko abazihawe ndetse bahawe n’ubumenyi burebana n’imyitwarire yo mu mazi bazaba intumwa nziza.

Sylidio Sebuharara