IGP Gasana yibukije ko impanuka nyinshi ziterwa n’abashoferi bica amategeko, abitangaza ubwo hatangizwaga ukwezi k’umutekano wo mu muhanda, kuri uyu wa mbere tariki 7 Nzeri 2015.

Yagize ati “Umuvuduko ukabije, abatwara basinze, kutambara ingofero ku bari kuri moto, gutwara nta ruhushya ufite, ibi ni byo bitwara ubuzima bw’abantu.”

Gasana akomeza avuga ko mu mezi atandatu ashize, impanuka zo mu muhanda zishe abantu bagera kuri 200 abandi barenga 300 baramugara.

Minisitiri w’Ubutegetsi bw’igihugu Francis Kaboneka, yavuze ko umutekano ari wo shingiro rya byose akemeza ko ari yo mpamvu ureba buri muntu wese ntuharirwe Polisi gusa.

Ati “Abigisha gutwara ibinyabiziga bajye bongeraho n’imyitwarire myiza, abanyeshuri bigishwe amategeko y’umuhanda.”

Yakomeje avuga ko yifuza ko uku kwezi kwarangira bigaragara ko impanuka zagabanutse, cyangwa zigacika burundu kuko iki gikorwa kitazahagarara.

Munyemana Désiré, utwara abagenzi kuri moto, avuga ko iki gikorwa cyibutsa abakoresha umuhanda kwitwara neza, avuga ko yiyemeje kubikangurira bagenzi be kugira ngo birinde impanuka.

Ubutumwa bwatanzwe kuri uyu munsi bwibanze ku nsanganyamatsiko igira iti "Ubahiriza amategeko y’umuhanda urengera ubuzima."

Gutangiza ukwezi k’umutekano wo mu muhanda byabereye mu karere ka Kicukiro mu mujyi wa Kigali, Nyabihu, Kamonyi, Kayonza na Rulindo mu zindi ntara z’igihugu. Polisi itangaza ko umwaka ushize igikorwa nk’iki cyagabanyije impanuka kugeza kuri 24%.

Mu ngamba zafashwe mu guhangana na kiriya kibazo harimo kongera umubare w’abapolisi mu muhanda, gukomeza ubukangurambaga, gufatanya n’izindi nzego z’ubuyobozi n’abaturage mu gukumira impanuka.

Izindi ngamba ngo bazajya bahemba abantu bazajya bagaragaza abanyamakosa, hari kandi kongera ibyuma bifata amashusho ku mihanda no gukangurira abashoferi kwitabira ubugenzuzi bw’ibinyabiziga.

Munyantore Jean Claude