Iyi ninayo mpamvu yatumye inzego za Polisi hirya no hino mu gihugu zihagurukira hamwe n’abayobozi b’inzego z’ibanze, bagasobanurira Abanyarwanda uko bakwitwara mu gihe hagaragaye ibimenyetso by’uko umuntu ashaka kugurisha abana b’abakobwa.

Nk’uko bitangazwa n’umuvugizi akaba n’umugenzacyaha wa polisi mu ntara y’amajyepfo, Chief Spertendant Hubert Gashagaza, ngo bimwe mu bigomba kwitonderwa ni ukugira irari ry’amafaranga kuko abagurisha abakobwa bababeshya ko bagiye kubageza ku bukire bukomeye ku buryo ngo byoroshye kugwa mu bishuko ku bana b’abakobwa.

N’ubwo nta mibare itangazwa y’abakobwa baba bacuruzwa hanze, ngo ni ngombwa ko n’ubwo ibimenyetso byagaragaye atari byinshi ari ngombwa ko Abanyarwanda bamenya ko abacuruza abantu no mu Rwanda bahageze.

Umuvugizi wa Polisi mu Ntara y’amajyepfo avuga ko ubu bucuruzi bw’abana b’abakobwa butandukanye n’uburaya busanzwe bukorwa, kuko gucuruza umuntu nta nyungu byinjiriza uwacurujwe mu gihe uburaya bwo bukorwa ku nyungu z’uwabwishoyemo.

Agira ati « human traficking ni ubucuruzi bukorerwa umuntu agakoreshwa ku nyungu zitamufitiye akamaro kandi nta burenganzira afite, mu gihe uburaya bwo buterwa n’ibyiyumva bya nyikubukora».

Umuvugizi wa Polisi mu Ntara y’amajyepfo avuga ko kandi muri iyi Ntara nta mibare izwi ku bakobwa baba barajyanwe hanze gucuruzwa, ariko ngo ni ngombwa gufata ingamba zirimo no gutanga amakuru mu gihe haba hari umuntu wabuze.

Abashuka abantu babashora muri ubu bucuruzi ngo babashakira ibyangombwa by’ibihimbano, ku buryo iyo ugeze hanze ibyangombwa byawe wabyambuwe ufatwa nk’uwambuwe agaciro kuko nt akikuranga uba ufite kandi nta n’uko wabona ugaruka mu gihugu.

Icyo gihe ngo uba ubaye uw’uwakujyanye akagukoresha ibyo ashaka birimo no gukoreshwa imibonano mpuzabitsina ku ngufu, n’ubundi bucakara butesha agaciro umuntu.

Ephrem Murindabigwi