Uyu mukobwa witabye Imana yari yasuye mugenzi we witwa Mukanyandwi Jacqueline n’uko ageze iwabo we na nyina bafatanya kumuzimanira bamuha ibiryo abirya ari wenyine ageze mu rugo atangira kumererwa nabi cyane.

Afatwa n’ubwo burwayi yatangiye kumva mu nda hamurya ajyanwa ku kigo nderabuzima cya Mweya ariko ahageze nabwo birananirana bamusabira koherezwa mu bitaro bya Nyanza ababyeyi be barabyanga bamujyana mu bavuzi ba Gihanga nibwo birangiye yitabye Imana tariki 2/01/2014 mu masaha ya saa tatu za mu gitondo.

Rutabagisha Herman uyobora umurenge wa Nyagisozi yabwiye Kigali Today ko nyuma y’urupfu rw’uwo mukobwa abo yari yasuye bahise batabwa muri yombi bakekwaho kuba bamurogeye mu biryo bamuzimaniye.

Ati: “ Umwana na nyina baho yari yagiye gusura bahise bashyirwa mu maboko ya polisi mu gihe iperereza rigikomeje kuri urwo rupfu ngo hamenyekane icyabaye intandaro yarwo”.

Umuyobozi w’umurenge wa Nyagisozi avuga ko umurambo wa Niyigena Béatha wajyanwe mu bitaro bya polisi y’igihugu biri ku Kacyiru mu mujyi wa Kigali kugira ngo ukorerwe isuzuma hamenyekane niba koko ari uburozi yahawe cyangwa niba ari ibiryo ubwabyo byari bihumanye mu bundi buryo.

Hagati y’uyu muryango n’uyu mwana w’umukobwa ngo nta makimbirane bari bafitanye kuko bari inshuti zikomeye bagasurana ndetse bagatizanya n’imyenda gusa ngo ubwo Mukanyandwi ntiyigeze arya ku biryo yazimaniye Niyigena; nk’uko Rutabagisha Herman uyobora umurenge wa Nyagisozi abivuga.

Jean Pierre Twizeyeyezu