Abaturanyi b’urwo rugo rwabereyemo iyo mirwano bavuga ko yatewe no kuba abo bagabo bombi bahahuriye umwe agashaka kwihaniza undi amukubita. Cyakora muri abo bagabo bombi barwanaga nta n’umwe wabashije gukomerekera muri iyo mirwano kuko batabawe aribwo bagitangira kumvana imitsi.

Bamwe mu bagize komite y’umugududu hamwe n’abaturage batabaye bavuga ko baje basanga Twahirwa Alikaab ariwe wunamye hejuru ya Gasana amukubita ibipfunsi mu majigo. Twahirwa Alikaab ngo niwe wari ufite ubukana bwinshi akubita mugenzi we Gasana Omar basangiye umugore.

Twahirwa Alikaab yabyaranye n’uwo mugore mu gihe Gasana we nta mwana barabyarana; nk’uko Mukazabyuma Muhamudu ushinzwe amakuru mu mudugudu wa Kirabo iyo mirwano yabereyemo yabibwiye Kigalitoday.

Nyuma yo gukiza abo bagabo bombi ubuyobozi bw’umudugudu wa Akirabo bwafashe icyemezo cyo kwiga kuri icyo kibazo mu nteko y’abaturage tariki 12/05/2012.

Mu nama yahuje abaturage b’uwo mudugudu, abo bagabo bombi bateje impagarara bahibereye hamwe n’umugore wabashyamiranyije, abaturage bemeje ko abo bagabo bombi nta burenganzira bafite bwo kongera gukandagira mu rugo rw’uwo mugore kugeza igihe umwe muri bo aziyemeza kumushaka mu buryo bwemewe n’amategeko.

Mukazabyuma Muhamadi ushinzwe amakuru muri uwo mugudugudu yatangaje ko kuva icyo cyemezo kikimara gufatwa bagiye gupanga irondo kuri urwo rugo kugira ngo abo bagabo batazongera kugaruka muri urwo rugo bitwikiriye ijoro bikageza ubwo bongera guteza ikibazo cy’umutekano muke barwana.

Jean Pierre Twizeyeyezu