Yari inama y’umutekano yaguye yabereye mu Murenge wa Bushekeri kuri uyu wa kane tariki 18 Kamena 2015, kubera ko ngo wagaragayemo ibyaha byinshi mu kwezi gushize kwa Gicurasi.

Abaturage bavuga ko muri iyi minsi basigaye baryama imitima itari mu gitereko bafite ubwoba ko hari umujura wabasanga aho baryamye akabatwara utwabo cyangwa se akaba yabagirira nabi, mu gihe babona byiyongera aho kugabanuka.

Rutebuka Aron avuga ko muri iyi minsi hari kugaragara ibikorwa byo kumena amazu y’abantu akemeza ko bikorwa n’insoresore zirirwa ku mihanda ntacyo zikora kandi zikenera kurya.

Agira ati “Hari abasore benshi tubona muri Bushekeri birirwa bicaye ku mihanda, birashoboka ko ari bo bicara bamena amazu, biradusaba rwose gukaza amarondo kugira ngo turebe uko twahangana n’abo bantu”.

Umuyobozi w’Akarere ka Nyamasheke Wungirije ushinzwe Ubukungu, Bahizi Charles, yabwiye abaturage ko umutekano mu karere wifashe neza, ariko avuga ko abaturage ba Bushekeri bakwiye gufata ingamba kugira ngo ibyaha byagaragaye bihagarare.

Yagize ati “Abaturage bagomba kongera gukaza amarondo, kuko bigaragara ko badohotse twese tugashakira hamwe uko ibihungabanya umutekano byahagarara, dufunga tunafungura akabari mu masaha yagenwe abaturage bakirinda ubusinzi, kandi bagahugukira umurimo kuko ni wo soko y’iterambere”.

Gusa, Ubuyobozi bw’Umurenge wa Bushekeri, bwo buvuga ko nubwo abaturage bavuga ko bahangayikishijwe n’ibyaha byo kumena amazu, bwemeza ko muri aya mezi atatu habayeho icyaha kimwe cyo kumena amazu, icyaha kimwe cyo gufata ku ngufu , impanuka 6 ndetse ibyaha 6 by’urugomo.

Kumena amazu ngo ni kimwe mu byaha byigeze kwibasira uyu murenge, ubuyobozi bukavuga ko abaturage baba bakikanga baringa kandi ikibazo cyarakemutse.

Umugwaneza Jean Claude