Amakimbirane hagati ya Ntahorugiye n’umuhungu we Tumusangire si ay’ubu kuko uyu mugabo wiyita umuvuzi gakondo yirirwa mu masoko agataha yasinze akabuza amahwemo umuhungu we; nk’uko bitangazwa n’abaturanyi be.

Karibwende Damien agira ati “Uyu mugabo yirirwa mu masoko ngo aracuruza imiti agatahira mu kabari yagera mu rugo yasinze akadukira umuhungu we rukabura gica.”

Aya makuru anahamywa na Kantengwa Sarafine, nyina wa Tumusangire akaba n’umufasha w’uyu Ntahorugiye, uvuga ko umugabo we aba adashaka ko umuhungu we aba mu rugo kuko buri gihe usanga amubuza amahoro kandi ntacyo bapfa.

Tumusangire w’imyaka 23 avuga ko atari ubwa mbere akubitwa na se kuko yari anaherutse kumukubita umuhini mu mutwe agarukira mu bitaro bya kaminuza bya Kigali (CHUK) yivuza ndetse akaba yaranakurijemo ubumuga bwo mu mutwe.

Harerimana Jean Baptiste, Umunyamabanga Nshingwabikorwa w’Akagari ka Kagina, arasaba abaturage kujya boroherana buri wese agahabwa uburenganzira bwe mu rugo ngo kuko ari byo byabarinda amakimbirane nk’ayo.

Niyonzima Oswald