Tuyisenge Irene wiyise DPC w’akarere ka Ngoma.

CIP Hamdhun Twizeyimana avuga ko kuri uyu wa 13 Werurwe 2019, Tuyisenge Irene yahamagaye abo mu muryango wa Baragora Joas ufunze ababwira ko ari umupolisi abaka amafaranga yo kumufunguza.

Ati “Uyu Tuyisenge yahamagaye abo mu muryango wa Baragora Joas ababwira ko ari DPC wa Ngoma abasaba kumuha ibihumbi 200 kugira ngo abafungurize umwana wabo kandi ikibazo yari afite kirangire.”

CIP Hamdhun Twizeyimana asaba abaturage kutajya bemera gushukwa n’abantu babonye bose kuko mbere yo kwemera ibyo bababwira bakwiye no kubasaba igihamya.

Tuyisenge yafashwe amaze guhabwa ibihumbi 22 gusa kuri 200 yari yatse.

Ikijerekani Mpozembizi yamanukiyemo ajya kuzana telefone mu musarane wa metero 17 z’ubujyakuzimu.

Uyu Baragora Joas bashakaga gufunguza yafashwe kuwa 09 Werurwe 2019 azira gushuka Mpozembizi Jean Marie Vianney kugira ngo amukurire telefone mu musarani birangira aguyemo.

Ibi byabereye mu mudugudu wa Rukore akagari ka Ndekwe umurenge wa Remera ku wa 09 Werurwe 2019 saa sita z’amanywa.

Baragora ngo akimara guta telefone yo mu bwoko bwa techno mu musarane, yasabye Mpozembizi Jean Marie Vianney kuyimukuriramo akamuha ibihumbi bine ndetse amushakira n’abantu bamufasha kumanukamo, ageze hagati umugozi yari afashe uracika agwamo.

Tuyisenge w’imyaka 23 aramutse ahamwe n’iki cyaha cy’ubwambuzi bushukana yahanishwa ingingo ya 174 iteganya igihano cy’igifungo kitari munsi y’imyaka ibiri ariko na none ntikirenge imyaka ine n’ihazabu y’amafaranga y’u Rwanda atari munsi ya miliyoni ebyiri ariko atarenga miliyoni eshatu.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1817 )