Abafashwe bahise bajyanwa mu murenge wa Remera, aho basanze izindi nzererezi 29 zari ziherutse gufatwa zikaba zari zimazemo iminsi zigishwa amasomo kuburere mboneragihugu na za kirazira.

Izi nyigisho zizamara ukwezi kumwe zigamije gutuma uru rubyiruko ruva mu ngeso mbi z’ubuzererezi, kunywa ibiyobyabwenge ndetse n’ubujura zigakurikiza indangagaciro nyarwanda.

Umukozi w’akarere ka Ngoma ushinzwe urubyiruko, Rutagengwa Jean Bosco, yatangaje ko bazakomeza gufata inzererezi ari nako zihabwa amasomo nk’ayo kugirango zigororoke.

Ikijyanye no kuba bazahabwa amasomo y’imyuga nkuko bigenda ku bajyanwe mu kigo cy’i Wawa, uyu mukozi yasubije ko ku ikubitiro aba batazahabwa inyigisho z’imyuga kuko bazamaramo igihe gito.

Mu mikwabu imaze iminsi ikorwa mu mujyi wa Kibungo hafatiwemo ibiyobyabwenge byinshi birimo urumogi, kanyanga ndetse n’inzererezi ibi byose bikaba bifatwa nk’ibiteza umutekano muke nk’urugomo, ubujura, gukubita no gukomeretsa.

Jean Claude Gakwaya