Uyu musore watawe muri yombi ku wa gatandatu tariki 16/11/2013, yafatiwe mu kagali ka Mburabuturo, umurenge wa Muko akarere ka Musanze, akaba avuga ko ubusanzwe ari umufundi ukorera mu mujyi wa Kigali, naho amafaranga yafatanywe akaba ari umushahara yari yahembwe.

Nk’uko bisobanurwa na polisi, ngo uyu musore yagiye kugura ibintu mu iduka, maze umucuruzi ntiyashira amakenga ayo mafaranga, niko guhamagara polisi atabwa muri yombi atyo, gusa ngo iperereza riracyakomeje ngo ukuri kw’ayo mafaranga kugaragare.

CSP Francis Gahima, ukuriye ubugenzacyaha mu Majyaruguru akaba n’umuvugizi wa polisi muri iyi ntara, avuga ko aya mafaranga agomba gupimwa na banki nkuru y’igihugu, yakwemeza ko ari amahimbano uyu musore agakorerwa idosiye agagukurikiranwa n’amategeko.

Yongeraho ko abantu bakwiye kwirinda imikorere nk’iyi bagamije indonke, kuko ngo polisi iri maso hamwe n’izindi nzego kandi biteguye kubata muri yombi bagakurikiranwa.

Jean Noel Mugabo