Mu mugezi wa Rwebeya habonetse umurambo w’umusaza

Uwo murambo wabonywe n’abaturage bo muri ako gace nyuma yo guhuruzwa n’umwana w’umuhungu wari uragiye ku nkengero z’uwo mugezi mu ma saa tanu n’igice z’igitondo cyo ku wa Kabiri tariki 14 Werurwe 2023, ku gice gihuriweho n’Imidugudu ya Bitare mu Murenge wa Musanze ndetse n’Umudugudu wa Gashangiro mu Murenge wa Cyuve.

Bikekwa ko uwo musaza yaba yaguye muri uwo mugezi, agatembanwa n’amazi kugeza ashizemo umwuka.

Imyirondoro n’aho akomoka ntibyahise bimenyekana, Polisi ikaba yahise itangira iperereza ngo hamenyekane icyaba cyihishe inyuma y’urwo rupfu nk’uko Umuvugizi wa Polisi y’u Rwanda mu Ntara y’Amajyaruguru, SP Alex Ndayisenga, yabitangarije Kigali Today.

Abaturage bo muri ako gace, bavuga ko umunsi ubanziriza uwo uyu musaza yabonekeyeho yapfuye, hari hiriwe umucyo nta mazi atembamo.

Munyaneza André, Umukuru w’Umudugudu wa Bitare, agira ati: "Hari hiriwe nta mazi atembamo. Gusa byageze mu masaha ya nijoro imvura iragwa, ku buryo bwagiye gucya uwo mugezi utemba. Byashoboka rero ko uwo muntu yaba yaguyemo akabura uko yitabara cyangwa atabarwa bikamuviramo gupfa. Tukibimenya twitabaje inzego zibishinzwe, ngo zize zirebe mu bushishozi bwazo, harebwe intandaro y’urwo rupfu".

Umugezi wasanzwemo uwo murambo, unyuramo amazi aturuka mu Birunga, aho mu gihe cy’imvura usanga abaturage bananirwa kuwambukiranya bitewe n’ubwinshi bw’amazi, aho bunakunze guteza iyangirika ry’ibiraro biwambukiranya.

Umurambo wahise ujyanwa mu bitaro bikuru bya Ruhengeri kugira ngo ukorerwe isuzuma.

MENYA UMWANDITSI

Ishimwe Rugira Gisele

Umunyamakuru

Reba inkuru zose nanditse ( 1070 )