Aba bakozi babiri ni Murwanashyaka Fabrice umucungamari w’ikigo nderabuzima cya Muhoza na Kalinda Mugisha John wari ushinzwe ubwishingizi mu buzima, bakaba barafatanyije maze bafungura konti mu izina ry’umuyobozi w’ikigo nderabuzima muri Fina Bank banigana umukono w’uyu muyobozi, niko kujya babitsa ndetse bakanabikuza uko bishakiye.

Umuyobozi w’ikigo nderabuzima cya Muhoza, Josee Nyirakabanza, avuga ko aba bantu baketswe ubwo bari mu gikorwa cyo kugenzura imikoreshereze y’amafaranga, biza kugeragara ko aba bagabo barimo batanga amakuru yiganjemo kwivuguruza, niko kwihutira gusuzuma uko ikibazo giteye.

Nyirakabanza avuga ko kugeza ubu amafaranga azwi yari yaranyerejwe n’aba bagabo ari miliyoni 57, harimo 40 basanze kuri konti yabo nshya bari barafunguje mu izina ry’ubuyobozi bw’ikigo nderabuzima, cyakora ngo baracyakomeza igenzura ngo bamenye umubare nyakuri.

Polisi mu ntara y’Amajyaruguru ivuga ko aba bagabo bombi bemera icyaha bakanagisabira imbabazi, ikanaboneraho gushima ubufatanye abaturage bakomeje kuyigaragariza hagamijwe guta muri yombi abakora ibyaha no kwicungira umutekano.

Jean Noel Mugabo