Abahageze biganjemo abagore baherekeje abagore bangenzi babo babuze abagabo

Umunyabanga nshingwabikorwa w’Umurenge wa Kabacuzi Pilote Rwigemera ahamya ko uwo mwobo bagiye gucukura mo ureshya na metero zisaga 40 y’ubujya kuzimu kandi ko ubutaka bwaho bworoshye cyane ku buryo nta buhanga nga bumwe bwakoreshwa ngo abo bagabo bakurwemo.

Ku wa gatatu tariki ya 17 mu masaha y’igitondo ni bwo Nsengiyumva Didace w’imyaka 31 uamavuko, na mugenzi we na Baranyeretse Oswald bivugwa n’abagore babo ko bavuye mu rugo bagiye ku kazi nk’ibisanzwe.

Cyakora amakuru ava mu buyobozi avuga ko iki kirombe baguyemo cyaherukaga gukora mu 1996 kandi cyari cyatafunzwe.

Nyuma y’uko abagore bategereje ko abagabo babo baza ku mafunguro ya saa sita bagaheba, yewe ngo bikaza kugeza mu masaha ya saa tatu z’ijoro, batarayaha, umwe muri abo bagore yigiriye inama yo gushakisha umugabo we, maze ngo ageze kuri icyo kirombe ahasanga umupira n’inkweto za boda boda yambaraga.

Ibyo ngo byatumye atabaza ubuyobozi ariko buhageze bigaragara ko nta butabazi bwakorwa kuko aho hantu hashyira mu kaga ubuzimba bw’abandi benshi.
Rwigemera akomeza avuga ko inzego za Polisi zishinzwe kizimya umuriro no gufasha mu bihe bikomeye bahageze na bo bagasanga ntawakwinjira.

Muri uyu mwobo ni ho hakekwa kuba haraburiyemo abagabo babiri

Agira ati, "Inzego zose zibifitiye umushobozi zarahageze, Ingabo na Police ariko byarananiranye nta buhanga bwakoreshwa ngo bakurwemo."

"Twasabye ababuze ababo kwihangana n’ubwo bo bakomeje kuvuga ko bakurwamo, ariko ibyageragejwe byose byagaragaje ko batavamo kuko twazanye n’imashini iranamirwa".

Hagati aho abo mu miryango ya ba Nyakwigendera bakomeje kuvuga ko ubutabazi bwakozwe budahagije, hari n’abavuga ko butanigeze bukorwa kuko ngo n’iyo mashini itigeze igira icyo ikora bakifuza ko hakoreshwa ubundi buhanga mu gushakisha ababo bamaze iminsi irindwi mu kuzimu.

Abo mu miryango y’all ba nyakwigendera bavuga ubuyobozi bwababujije kwishora muri icyo kirombe ngo na bo batahasiga ubuzima.

Rwigemera abasaba kwiyakira kuko nta kindi cyakorwa.

Avuga kubera gushidikanya niba abo bagabo bataraburiye ahandi hantu, hakozwe iperereza bikagaragara ko nta handi baba bari ari yo mpamvu byashoboka ko bari mu kirombe.

Avuga ko nk’ubuyobozi nta kirakorwa ngo imiryango ya ba Nyakwigendera isurwe ifatwe mu mugongo ariko ngo bizakorwa iyo miryango yamaze kwiyakira.

Aba Bantu nibadakurwa muri iki kirombe byaba ari ubwa mbere hagaragaye ikirombe gihinduwe imva kuko ahandi babashije kujya bakurwa mo, cyangwa se bikananirana ariko habaye ukugerageza.

Umugore wa Baranyeretse yirirwa aha hamwe na mugenzi we