Iyi nzu yubakwaga ku Muhanda ujya i Butare munsi y’isoko rya Muhanga, iguye ku isaha ya saa tanu, aho haguye igice cyo hejuru mu magorofa atatu agerekeranye yari ifite. Icyo gice cyagwiriye uruhande rw’umuhanda wa kaburimbo uri imbere ya banki ya KCB.

Ababonye iyi mpanuka iba bavuga ko umugore witwa Odeta Mukanyandwi yarimo ahereza isima aho bamena beto, abonye ko ibyo bubakaga bisenyutse arasimbuka aravunika ubu akaba yajyanwe ka muganga ku bitaro bya Kabgayi.

Inzego z’umutekano harimo Polisi n’ingabo zatabariye hafi zigeza Mukanyandwi ku bitaro, ariko kugeza ubu ziravuga ko nta kibazo kinini cyane agaragaza kuko arimo kwitwabwaho mu buryo bwihuse.

Kigali Today yagerageje kuvugisha uwubakisha kuri iyi nyubako, ariko mu magambo atatu gusa yagize ati “Nta Mutima mfite”.

N’ubwo uyu Athanase Ndagijimana ari nawe nyir’inzu ataraboneka ngo asobanure byinshi ku nzu ye, bamwe mu bayibonaga yubakwa bakeka ko iyo mpanuka yaba yatewe n’ibikoresho bidakomeye byayubakishwaga.

Bamwe mu bakozi bavuga ko bagize ubwoba nyuma yo kubona iyi mpanuka kandi nta bwishingizi bw’impanuka bari bafite usibye amakarita y’ubwisungane mu kwivuza gusa.

Abareba ibikoresho byubatse iyi nzu ariko batari inzobere mu by’imyubakire bavuga ko ibyuma bubakishaga birimo n’uruvange rwa Sima n’imicanga, bitari ku kigero cyo kubaka inzu y’amagorofa atatu.

Ubwo iyi nkuru yandikwaga ubuyobozi bw’akarere ka Muhanga nabwo bari butaraboneka, kugira ngo butangaze zimwe mu ngamba zigiye gufatwa ndetse n’uburyo uwo muntu yaba yarabaciye mu rihumye agakoresha ibikoresho bitujuje ubuziranenge.

Ephrem Murindabigwi