Uyu mugore w’imyaka 33 mwene Ndababonye André na Nyirashyikirano Debora yahoraga mu makimbirane n’umugabo we Munyaneza Léon bafitanye abana bane, bigera naho yahukanira ku babyeyi be batuye mu Karere ka Kirehe mu Murenge wa Nasho.

Tuyisenge Jean Marie Vianney, umwe mu bagize urwego rufasha inzego z’ibanze mu gucunga umutekano (DASSO) bakorera mu Murenge wa Nasho atangaza ko amakuru akesha iperereza rya Polisi avuga ko Ayinkamiye yari asubiye mu rugo iwe yatumweho n’umugabo we ngo ajye kureba umwana wahiye.

Ayinkamiye ngo yazindutse saa kumi n’imwe z’igitondo ageze mu birometero bibiri uvuye aho ababyeyi be batuye ahura n’abagizi ba nabi baramutemagura, abashinzwe umutekano batabaye basanga yashizemo umwuka n’abagizi ba nabi bahunze.

Umunyamabanga Nshingwabikorwa w’Umurenge wa Nasho, Hakizamungu Adélite avuga ko bidasanzwe muri uwo murenge aho abantu bafata umuntu bakamutemagura bakagera aho bamwica.

Akomeza avuga ko iki gikorwa ari ubugome bw’indengakamere bityo agasaba abaturage gukaza umutekano bakora amarondo, bahana n’amakuru ku gihe.

Ati “nubwo mu masaha byabaye amarondo yariho asoza mu gitondo kare bamwicira ahantu h’imisozi hadatuwe, abaturage bakwiye gukaza amarondo bahana amakuru no gukemura amakimbirane, n’ubwo biriya byabaye atari amakimbirane y’imiryango ari abagizi ba nabi”.

Umuyobozi w’umurenge yihanganishije abaturage bo mu Murenge wa Nasho by’umwihariko umuryango wabuze umuntu.

Mu batungwa agatoki mu rupfu rwa Ayinkamiye haravugwa mo umugabo we Munyaneza Léon ku mpamvu y’amakimbirane bari bafitanye.

Servilien Mutuyimana