Usibye kuba bibwa, bamwe bakurizamo n’ubumuga

Bamwe mu batuye mu bice bitandukanye by’umujyi wa Kigali, birimo uduce twa Kimisagara, Nyakabanda na Rwezamenyo muri Nyarugenge, hamwe n’uduce twa Kagugu, Gisozi, Remera ahazwi nka Nyabisindu ndetse na Nyagatovu muri Kimironko bagiye bibwa bakanagirirwa nabi mu bihe bitandukanye byo mu kwezi kwa Kamena na Nyakanga 2022, baganiriye na Kigali Today, bayitangarije ko bibwe bashikujwe telefone zigendanwa, bagerageza kwirwanaho bakagirirwa nabi kugeza bagiye mu bitaro.

Elias Hakizimana utuye mu Murenge wa Kimironko muri Gasabo, avuga ko tariki ya 10 Kamena mu mu masaha ashyira saa sita z’ijoro, yatashye nk’ibisanzwe mu gihe yaburaga iminota hafi 10 ngo agere aho atuye, akaza guhura n’abajura bakamuniga.

Ati “Numvaga ibintu ari amahoro, sinzi ukuntu numvise ibintu byanguyeho ngira ngo ni amashitani, birimo kunigagura, nashidutse ntamenyo, bamenaguye, na telefone batwaye, kandi hari ahagikinguye abantu barimo guhaha abandi barimo kunywa, ariko uwakubwira ko nabuze n’untabara, kuko baje namaze kwangirika”.

Akomeza agira ati “Baranyangije bikomeye, kuko bankomerekeje agahanga, amenyo yendaga kuvamo, usibye ko abaganga basanasana, nitaye ku buzima gusa nta n’ubwo nagiye gukurikirana ngo ni bande, n’ubu ndacyarwaye merewe nabi, hashize ukwezi ariko n’ubu ntunzwe n’isupu ntabwo mbasha kurya amenyo ntafata, arimo ibyuma kuko bangije cyane igice cy’umutwe, amenyo, n’umunwa”.

Uwitwa Genereuse Iyamuremye utuye mu Murenge wa Gisozi mu Karere ka Gasabo, avuga ko amaze iminsi ibiri arwariye mu bitaro bya Kaminuza bya Kigali (CHUK), kubera gukubitwa akavunwa ukugura n’abari bamaze kumwiba telefone ku manywa y’ihangu hagati ya saa saba na saa munani, ubwo yari avuye gusenga ku wa Gatandatu, kuri ubu akaba ategereje kubagwa.

Ati “Nari ndimo mva gusenga amateraniro arangiye, i Kagugu ngeze hafi ya sitasiyo Merez, umuntu anturuka inyuma anshikuza telefone, mukurikiye arahindukira ankubita inkoni yari afite ku kuguru, arakomeza aragenda, ndyama aho mu muhanda kugeza igihe abantu bahansanze, banjyana kwa muganga”.

Ntiyahise abona uko ajya gutanga ikirego, kuko ari mu bitaro.

Iyamuremye avuga ko mu minsi ibiri amaze muri CHUK, amaze kubona abantu barenga batatu bazanwa bakomerekejwe cyane, bavuga ko bakubiswe n’abajura igihe bageragezaga kubarwanya ubwo barimo kwibwa.

Uretse Hakizimana na Iyamuremye bo mu Karere ka Gasabo, Kigali Today yaganiriye n’uwitwa John Bagabo wo mu Murenge wa Nyakabanda mu Karere ka Nyarugenge, na we ayitangariza ko aheruka guhura n’abajura ubwo yari asohotse mu rugo, ahagana saa kumi n’ebyiri z’umugoroba bakamukubita bakamwiba telefone.

Yagize ati “Nagiye kumva numva ankubise ikintu, niba ari ibuye niba ari iki simbizi, igihe ngihindukira ndimo ndwana no kujya kugwa hasi, bagenzi be bahita bavuga bati, hita umutera icyuma, igihe nkigundagurana na we ngiye guhindukira, ahita anshikuza telefone ya ‘smart’, bahita biruka bagenda batyo. Abajura byo ni ikibazo kizwi hano muri Nyakabanda, kuko kimeze nabi.”

Ati “Hano Nyakabanda, Rwezamenyo na Gitega, rwose ni ibintu navuga byamaze kuba rusange, kuko mu ma saa kumi n’ebyiri, saa moya, nk’ahantu ntuye rwose ujya kumva ukumva umuntu aratatse ngo barayitwaye, cyane cyane telefone n’udushakoshi tw’abakobwa”.

Abatuye mu Mujyi wa Kigali basaba ko umutekano wakazwa, ku buryo abajura babura aho bamenera, kugira ngo bajye bagenda bisanzuye nk’uko byari bimeze mbere, kuko kuri ubu bavuga ko ubujura burushaho kwiyongera, bityo abantu bakagenda bafite ubwoba ko bashobora guhura n’abajura bakabagirira nabi.

Ubuyobozi bw’Umujyi wa Kigali mu butumwa bwoherereje umunyamakuru wa Kigali Today ubwo yari ababajije kuri iki kibazo, bwahumurije abawutuye ko umutekano uhari kandi ucunzwe neza n’inzego ziwushinzwe, ariko bugasaba abaturage gutangira amakuru ku gihe no kudahishirana, kuko iyo uhishiriye umujura cyangwa uwishora mu bikorwa by’ubugizi bwa nabi, birangira ari bo basanzwe mu byaha by’urugomo n’ibindi.

Inzego z’ibanze muri uyu Mujyi na zo zikomeje gukora uko zishoboye hongerwa ubushobozi bw’irondo ry’umwuga kugira ngo bakomeze kuba benshi mu duce tuvugwamo bene ubwo bujura.

Umuvugizi wa Polisi y’u Rwanda, CP John Bosco Kabera, yabwiye Kigali Today ko ibibazo by’umuntu ushobora kuba yahohotera mugenzi we bikagaragara bikurikiranwa, ari na ho ahera asaba abahura n’ibibazo nk’ibyo kwihutira gutanga amakuru kuri Polisi ibegereye.

Ati “Icya mbere ubujura ntabwo bwemewe, icya kabiri ni uko abantu babukorewe bakwiye kwihuta babwira polisi nk’uko bizwi bigenda buri gihe, kuko iyo utabaje Polisi hari ukwibye cyangwa uguhohoteye, irakurikirana abo bantu bagafatwa bagashyikirizwa inzego zibishinzwe bakajya mu nkinko bagakurikiranwa”.

Abatuye mu Mujyi wa Kigali barasaba ko amarondo yakazwa akajya akorerwa mu duce tuvugwamo ko dukunda gukorerwamo ibikorwa by’ubujura kuko ahenshi haba hazwi.

Ubuyobozi bw’Umujyi wa Kigali buheruka gutakambira Sena y’u Rwanda, buyitakambira buyisaba ko babakorera ubuvugizi ingengo y’imari ikoreshwa mu guhangana n’ubuzererezi ikongerwa kuko akenshi ari bwo buvamo abajura, aho bagaragaje ko mu mu mwaka ushize w’ingengo y’imari hakoreshejwe Miliyari 1.2, hanagaragazwa ko 80% by’abajura bo muri Kigali babarizwa mu Karere ka Nyarugenge.

MENYA UMWANDITSI

Tarib Abdul

Umunyamakuru

@ lvRaheema

Reba inkuru zose nanditse ( 1236 )