Habyarimana yafatanywe imbunda yo mu bwoko bwa Kalashnikov ashaka kuyigurisha. Umuyobozi w’akagari ka Kabura, Kongolo Hesironi, yatangaje ko hari umuturage wumvise Habyarimana avuga ko ashaka kugurisha imbunda maze ahita abibwira urwego rwa polisi ya Kabarondo.

Kongolo yasobanuye ko polisi yahaye amafaranga uwo muturage kugira ngo abe ari we ujya kugura ya mbunda mu rwego rwo gufatira mu cyuho uwashakaga kuyigurisha. Uwo muturage yagiye kuyigura abapolisi na bo bamukurikira bambaye gisivili, Habyarimana afatwa atyo.

Ubwo yafatirwaga mu cyuho, Habyarimana yashatse kurwanya abapolisi ndetse yanga kubaha iyo mbunda. Kuyirwanira rero byatumye araswa amasasu atatu mu nda.

Habyarimana yahise ajyanwa kuvurizwa mu bitaro bya Rwinkwavu kandi agikurikiranyweho icyaha cyo gutunga imbunda ku buryo butemewe n’amategeko.

Habyarimana ni umwe mu ngabo zavuye k’urugerero akaba yari no mu nkeragutabara.

Cyprien Ngendahimana