Iyo kamyo yavaga i Kigali yerekeza mu gihugu cya Tanzaniya, igeze mu masangano y’umuhanda [rond point] yo mu Mujyi wa Kayonza umushoferi wari uyitwaye ntiyakata ngo akomeze mu muhanda wa Tanzaniya yisanga agiye kwinjira mu biro by’akarere.

Umushoferi ntitwabashije kumubona ubwo twateguraga iyi nkuru, ariko bamwe mu bo yavugishije badutangarije ko iyo mpanuka yayitewe no kutamenya ko yari yageze aho yagombaga gukatira bitewe n’uko nta byapa biri ku muhanda bigaragaza neza ko rwagati mu Mujyi wa Kayonza hari ‘rond point’

Gusa hari n’abavuga ko ashobora kuba yari yasinziriye akisanga atakibashije gukata ngo akomeze mu muhanda wa Tanzaniya, nubwo na bo bemeza ko hakwiye ibyapa ku muhanda biyobora abashoferi mbere y’uko binjira rwagati mu mujyi wa Kayonza.

Uretse ibyo byapa bamwe mu bavuganye na Kigali Today banavuga ko umuhanda winjira mu Mujyi wa Kayonza ukwiye gushyirwamo dodani [dos d’anne] kuko usa n’ushunguka kandi amakamyo akaba akunze kuhanyura yihuta cyane.

Si ubwa mbere impanuka nk’iyi ibera mu masangano y’Umujyi wa Kayonza kuko mu mwaka ushize hari indi yataye umuhanda ishaka kwinjira mu biro by’akarere, ariko umushoferi abasha kuyikata ayihagarika iruhande rw’akarere nta bintu yangije.

Kugeza saa saba n’igice z’amanywa kuri uyu wa gatatu Polisi yari ikigerageza kuvana iyo kamyo mu muhanda, iyi mpanuka ikaba yatumye amashanyarazi abura mu Mujyi wa Kayonza kuva mu rukerera.

Umuvugizi wa Polisi/Ishami rishinzwe Umutekano wo mu Muhanda, Spt Jean Marie Vianney Ndushabandi, avuga ko ibyo gushyira ibyapa na dodani ku mihanda bikorwa na Minisiteri y’ Ibikorwa Remezo, icyo Polisi ishobora gukora ngo akaba ari ukujya kureba niba ibivugwa koko ari ukuri ubundi igakora ubuvugizi.

Cyprien M. Ngendahimana