Nk’uko bivugwa na nyir’akabari, ngo uyu mugore yari yakanywereyemo ku mugoroba, akavanga Primus n’inzoga yitwa akaginga (Gin); maze ziramusindisha cyane, ku buryo yabuze uko ataha akaryama aho yanywereye.

Tereraho avuga ko yamurekeye aho, nawe yigira mu kindi cyumba araryama. Ngo ahagana mu masaa kumi n’imwe za mugitondo niho yabyutse , asohotse asanga wa mugore yapfuye, ahita atabaza.

Mu gihe umurambo w’uyu mugore wajyanywe ku bitaro bya Kabgayi ngo hakorwe isuzuma ry’icyamwishe, Tereraho we ari mu maboko ya Polisi sitasiyo ya Musambira ngo asobanure ibyabereye mu kabari ke.

Umunyamabanga w’umurenge wa Musambira, Kayiranga Emmanuel, atangazwa n’ukuntu Tereraho yaraje umunywi mu kabari ke. Ati “ese n’iyo ataza gupfa, abasanga umuntu w’umugabo yarararanye n’umugore utari uwe mu nzu imwe, yabifata gute?”.

Yongeraho ko ubusanzwe ngo utubari two mu cyaro badusaba gufunga saa tatu za nijoro, bakererwa bakageza saa yine.

Marie Josee Uwiringira