Nyirazogeye Clarisse, umukobwa wa nyakwigendera, avuga ko icyo akeka ari uko umubyeyi we yaba yarishwe n’abantu bari bafitanye urubanza rw’amasambu kuko ubwo yanicwaga bwari gucya ajya kuburana.

Ikindi yemeza ni uko umubyeyi we nta kibazo yajyaga agirana n’abaturanyi be cyatuma hari uwatekereza ku mugirira nabi. Ibi kandi byemezwa n’umuturanyi we witwa Agnes Kubwimana.

Kubwimana ari nawe wabanje kumenya ko Ndoricyimpa yishwe ubwo yari agiye kumubaza ibijyanye n’ishyirahamwe ryabo, anavuga ko atemeranya n’abavuga ko abamwishe baba ari abajura bashakaga kumutwara inka kuko basanze nta kintu na kimwe batwaye usibye impapuro z’urubanza zaciwe izindi zikabura.

Aho Anne Marie yari atuye ari naho yiciwe mu nzu.

Umunyamabanga nshingwabikorwa w’umurenge wa Kibilizi, Kimonyo Innocent, aravuga ko mu gihe hakomeje gushakishwa uwishe Ndoricyimpa, hanakomeje inama n’ibiganiro n’abaturage bigamije kongera kubibutsa ko bagomba kwita ku mutekano w’abaturanyi babo cyane cyane nk’aba baba bazwi ko baba bonyine.

Umuvugizi wa Polisi mu ntara y’Amajyepfo akaba n’umugenzacyaha, Chief Supretendent Hubert Gashagaza, aratangaza ko abakekwaho iyicwa ry’uyu mukecuru bari mu maboko ya Polisi mu gihe hakomeje gukorwa iperereza.

Arasaba kandi abaturage kwirinda ubugizi bwa nabi bashakira ibisubizo by’ibibazo aho bitari, abashishikari kujya bageza ibibazo byabo ku babishinzwe bigakemurwa mu mucyo aho kwishora mu bwicanyi.

Ati “Turasaba abaturage ko ufite ikibazo yajya akigeza ku nzego zibishinzwe hakiri kare kigenerwe igisubizo, kugirango dukumire ubwica nk’ubu”.

Abakekwaho kwica uyu mukecuru nibahamwa n’icyaha, bazahanishwa ingingo ya 140 mu gitabo cy’amategeko ahana mu Rwanda. Iyi ngingo iteganya igihano cyo gufungwa burundu ku muntu wishe undi yabigambiriye.

Clarisse Umuhire