Umukecuru Ryaziga wari utuye mu kagari ka Rwanza umudugudu wa Kigarama, ngo yaba yishwe mu masaha ya saa mbiri z’umugoroba; nk’uko abaturanyi be babivuga.

Babimenye ubwo umwana wo mu baturanyi wajyaga ajya kumuraza yajyagayo agahamagara akabura umwitaba maze agasubira guhamagara iwabo ngo baze bamuherekeze kuko yari yatinye kwijyana mu nzu.

Ubwo iwabo w’umwana bazaga nabo bahamagaye ntibamubona nyuma bajya gushakira mu gikari aho bamusanze mu bwiherero aho yari yicishijwe amabuye bamukubise mu mutwe.

Uyu mukecuru nyakwigendere yari yararokotse Jenoside yo muri Mata 1994, mu bana batandatu yari afite asigarana gusa n’umukobwa we washatse ahitwa muri Ntyazo mu karere ka Huye.

Denis Ntambara ukekwaho icyo cyaha ni umukwe wa nyakwigendera bari basanzwe bafitanye amakimbirane n’uyu muryango bitewe n’uko umugore we yajyaga azanira nyina ibyo kurya bivuye mu rugo ku mugabo we bikamurakaza ku buryo yageze ubwo yirukana umugore we mu nzu babanagamo akamushyira mu yindi yo hanze.

Ikindi cyateye ubuyobozi gukeka uyu mugabo ngo ni uko atari ubwa mbere akora ibyaha byo kwica kuko mu mwaka wa 1984 yaba yarafunzwe azira kwica se wabo amwicisha amabuye nk’uko uyu mukecuru yishwe. Mu 1994 nabwo yafungiwe gukora Jenoside afungurwa mu 2008.

Uhagarariye polisi mu Ntara y’Amajyepfo, CPS Elias Mwesigye, yagize ati “Kuba yarigeze gukora ubwicanyi inshuro zigera kuri ebyiri, hakiyongeraho ayo makimbirane no kuba yari amaze iminsi igera kuri ine ari ino bituma akekwa ku mwanya wa mbere”.

Inzego z’umutekano zigomba gukora cyane zikita ku kumenya abinjira n’abasohoka kandi umutekano w’abacitse ku icumu ikitabwaho by’umwihariko kuko akenshi kuba bonyine biri mu bituma bahohoterwa ku buryo bworoshye; nk’uko bitangazwa n’umuyobozi w’akarere ka Gisagara, Leandre Karekezi.

Yagize ati “Abashinzwe umutekano nibongere imbaraga kandi bibuke buri gihe kuzuza amakayi y’abinjira n’abasohoka. Abaturage turabasaba kutagira ubwoba ahubwo bagakomera kugira ngo babashe gushyira hamwe bicungire umutekano”.

Clarisse Umuhire