Ibyumba bine by’amashuri byasambutse mu Murenge wa Gishubi

Ibyumba by’amashuri byasambutse ni ibyo ku ishuri ribanza rya Muyinza, ryahanzwe mu Kagari ka Nyeranzi, Umurenge wa Gishubi. Ryahanzwe mu rwego rwo gukemura ikibazo cyo kujya kwigira kure ku bana bo muri ako gace.

Umuyobozi w’Akarere ka Gisagara, Jérôme Rutaburingoga, avuga ko urebye uko aya mashuri yasambutse byaturutse ku kuba n’ubwo igisenge cyari cyaraziritswe, byari byakozwe nabi.

Agira ati "Twahubatse amashuri 12, ariko ayasambutse ni ane. Ni igisenge cyagurutse, kigurukana n’ibyuma cyari gifatiyeho. Cyari cyaziritswe nabi."

Uyu muyobozi anavuga ko iki gisenge kigiye gusubizwaho vuba, ku buryo ku itangira ry’amashuri tariki 18 Mutarama 2020, aya mashuri na yo azaba abasha kwigirwamo.

Yavuze kandi ko agiye gusaba abanyamabanga nshingwabikorwa b’imirenge yubatswemo ibyumba by’amashuri muri iki gihe, kugenzura uko ibisenge byagiye bizirikwa, ishuri ku rindi, mu rwego rwo kwirinda ko hagira irindi ryazasambuka.

Mu gihe hirya no hino mu Rwanda hubatswe ibyumba byinshi by’amashuri, muri Gisagara hubatswe 779, harimo 395 byamaze kuzura. Hasigaye 384 na byo biri hafi kuzura.

Imvura yasambuye amashuri i Gishubi yanasize yangije inzu yari icumbitsemo umubyeyi witwa Joséphine Uwiringiyimana hamwe n’abana be babiri b’imyaka 16 n’imyaka icyenda, mu Mudugudu wa Rugara, Akagari ka Gisagara, Umurenge wa Ndora.

Joséphine Uwiringiyimana n’abana be babiri na bo bagwiriwe n’inzu

Mu ma saa mbili za mu gitondo kuri uyu wa Gatandatu tariki 9 Mutarama 2021 iyo nzu yaguye, ariko ku bw’amahirwe ngo nta we yahitanye, nta n’ibyangiritse ubwo yagwaga, uretse amafaranga 6500 FRW babuze.

Iyi nzu yabaguyeho bari barayitijwe na Sérapie Nyirantama w’imyaka 90, wari warayivuyemo akajya kubana n’umuhungu we.

Meya Rutaburingoga avuga ko uyu muryango wagwiriwe n’inzu wacumbikiwe mu baturanyi, ariko ko hagiye gushakwa uko wabonerwa aho kuba, hatanirengagijwe nyiri inzu.

MENYA UMWANDITSI

Marie Claire Joyeuse

Umunyamakuru

@ JoyeuseC

Reba inkuru zose nanditse ( 1561 )