Meya w’Akarere ka Gicumbi yabanje gusuzuma iyo moto ngo yumve ko ari nzima

Ni moto bashyikirije urwego rwa DASSO muri uwo murenge, umuhango wabaye nyuma y’umuganda rusange usoza ukwezi kwa Gicurasi, ahatunganyijwe umuhanda hasiburwa n’ibyobo bifata amazi y’imvura.

Umuhango wo gushyikiriza DASSO iyo moto yaguzwe n’abaturage, wayobowe n’Umuyobozi w’Akarere ka Gicumbi, Nzabonimpa Emannuel, washimiye abo baturage b’umurenge wa Giti, uburyo bakomeje kwiteza imbere bishakamo ibisubizo bahereye ku mutekano wo uhatse byose.

Mayor Nzabonimpa yijeje abo baturage ko iyo moto biguriye bazayisigasira, anasaba abazayikoresha na bo kuzajya bayifata neza, bayikoresha akazi yaguriwe ko gucunga umutekano w’abaturage.

DASSO yishimiye iyo moto yaguriwe n’abaturage, abayihawe babizeza kuyifata neza

Ubwo butumwa bw’Umuyobozi w’Akarere ka Gicumbi bwashimangiwe n’Umuhuzabikorwa wa DASSO mu Karere ka Gicumbi, Umuganwa Nyangabo Jean Paul, washimiye abaturage b’Umurenge wa Giti batekereje iki gikorwa cyo kugura moto yo kunganira inzego z’umutekano mu murenge, abizeza ko bazakomeza kurangwa n’imikoranire myiza barwanya icyavangira umudendezo w’abaturage.

Muri icyo gikorwa cyo gushyikiriza inzego z’umutekano iyo moto yaguzwe n’abaturage, abana bahawe amata, muri gahunda y’ubukangurambaga ku batuye uwo murenge, bugamije gushishikariza abaturage kwitabira gahunda yiswe“Muturanyi, ngira nkugire tugeraneyo”, iherutse gutangizwa n’ubuyobozi bw’Akarere, hagamijwe guca burundu indwara z’imirire mibi n’igwingira mu bana.

Hakozwe ubukangurambaga bwo kurwanya igwingira mu bana

Meya Nzabonimpa aha abana amata

Igikorwa cyo gutaha moto biguriye cyabaye nyuma y’umuganda