Umunyamabanga nshingwabikorwa w’Umurenge wa Cyumba, Bayingana Jean Marie avuga ko ubu bwicanyi bwabereye mu Murenge wa Cyumba mu Kagari ka Rwankonjo mu Mudugudu wa Rukizi mu masaha ya saa saba z’ijoro tariki ya 8 Gicurasi 2015, aribwo abari ku irondo bumvise induru maze bafatanyije n’ubuyobozi bw’umudugudu batabaye bageze aho uyu musore Mananzima yari acumbitse basanga yakubiswe cyane yabaye intere.

Ubuyobozi bwihutiye kumugeza ku kigo nderabuzima cya Mulindi bamugejejeyo ahita apfa.

Mu iperereza ryakozwe ngo ni uko uyu Mananzima bahimbaga Nzima yakubiswe n’abantu bari mu mutwe winjiza kanyanga mu Rwanda bayikuye mu gihugu cya Uganda witwa “Abarembetsi” kuko ngo yabatangagaho amakuru.

Uyu nyakwigendera ngo nawe yahoze muri uyu mutwe w’Abarembetsi nyuma aza kubivamo kubera inyigisho yari yarahawe, ariko bagenzi be babisigayemo bafatirwa mu cyuho bakumva ko ariwe wabavuze.

Bayingana akomeza avuga ko muri bo hari abiyemereye ko bamukubise ariko polisi ikorera muri aka karere ikaba igikomeje gukora iperereza.

Abatawe muri yombi harimo uwitwa Byaruhanga Dieudonnée, Maniriho Jean Paul, Abizera Jean Baptiste, Ntibanyendera Janvier, Ntahobitagwa, Tumwekizere, Hakizimana Jean Baptiste bakunze kwita Munyarwanda, n’uwitwa Hakorimana Jean de Dieu.

Ubuyobozi buvuga ko uyu mutwe winjiza kanyanga atari ubwa mbere wica abantu kuko mu mwaka wa 2013 bahitanye umugore bari babikije kanyanga baje kuyimwaka basanga yayitanze mu buyobozi, ndetse mu mpera z’umwaka wa 2013 bica umusaza wari ushinzwe gutanga amakuru mu nzego z’umudugudu wo mu Murenge wa Rubaya.

Bayingana asaba inzego zishinzwe umutekano ubufatanye kugira ngo babashe guhashya uyu mutwe kuko nta muntu wapfa kuwisukira wenyine kuko baba bitwaje intwaro gakondo ku manywa bityo bakaba bagirira nabi umuntu.

Ernestine Musanabera