N’ubwo aba baturage bavuga ko bazi neza ingaruka mbi zo gukoresha ibiyobyabwenge, banemeza ko muri uyu murenge wabo bigihari cyane cyane nka Kanyanga hamwe n’urumogi.

Musonera, umuturage wo muri Kagari ka Simbwa, yemeza ko hakigaragara inzoga za kanyanga, aha akavuga ko mu mvugo ijimije usanga bayita “akantu” cyangwa se “wangu”.

Agira ati “hano inzoga ya kanyanga bayinywera ku mugaragaro kuko n’ibiciro nta muntu uba atabizi, ikunze guturuka muri Uganda ariko hari n’abayiyengera, usanga rero abaturage ba hano baragiye bayiha andi mazina mu rwego rwo kujijisha ubuyobozi”.

Umurenge wa Kabarore ni umwe mu mirenge ihana imbibi n’Akarere ka Nyagatare gakunze gukoreshwa nk’inzira y’ibiyobyabwenge kuko gahana imbibi n’igihugu cya Uganda kandi bivugwa ko ariho byinshi muri ibyo bituruka.

Mu ngamba zafashwe n’ubuyobozi bw’Umurenge wa Kabarore, ni ugushyiraho ikipe y’abantu bashinzwe umutekano bakajya bagenzura ahakekwa hose ko haba hacururizwa iyi nzoga, ariko ngo n’ubuyobozi bwa Polisi bubibafashamo.

Bimwe mu biyobyabwenge bikunze kugaragara mu karere ka Gatsibo muri rusange ni kanyanga, izifunze mu masashi bakunze kwita Chief waragi hamwe n’urumogi. Mu rwego rwo gukomeza kurwanya ikoreshwa ry’ibi biyobyabwenge, iyo bifashwe biratwikwa bityo bene byo bikabapfira ubusa.

Benjamin Nyandwi