Dusabimana ufite imyaka 25 na Mutoni w’imyaka 21 batuye mu Murenge wa Gitega ho mu Karere ka Nyarugenge, bombi bafungiye kuri sitasiyo ya Polisi ya Gisozi mu gihe iperereza rikomeje.

Umuvugizi wa Police y’u Rwanda mu Mujyi wa Kigali, Superintendent of Police (SP) Modeste Mbabazi, yavuze ko bafatiwe mu Kagari ka Murama aho bakaga buri mucuruzi ibihumbi bibiri by’amafaranga y’u Rwanda bababwira ko ari ayo kubarura amaduka yabo.

SP Mbabazi yavuze ko bari bafite amakarita agaragaza ko ari abakozi ba RRA kandi ko bahaga abo bambuye inyemezabwishyu z’iki kigo, ariko ko byose byari ibihimbano.

Mbere y’uko batabwa muri yombi, Polisi yari yahawe amakuru n’abaturage bari bamaze kubatahura.

Aba bakobwa batawe muri yombi biyita abakozi ba RRA bakaka amafaranga abacuruzi.

Dusabimana yavuze ko we na mugenzi we bari bamaze iminsi itatu batangiye ubu bujura, kandi ko we wenyine yari amaze kwambura amafaranga y’u Rwanda ibihumbi 50. Yavuze kandi ko ariwe wikoreye iyo karita mpimbano yamugaragazaga nk’umukozi wa RRA.

Ngizwenayo Jean Damascene, asobanura uko aba bombi bamwibye, yagize ati,"Saa kumi n’igice z’umugoroba barakomanze barambwira ngo ni abakoki ba RRA. Bambwira ko bashaka amafaranga y’umusoro, n’inyemezabwishyu y’ipatante. Nabahaye amafaranga ibihumbi bibiri by’amafaranga y’u Rwanda, banyandika ku rupapuro, bampa inyemezabwishyu ariko ndayikemanga, kuko iyo bampaye nasanze ari iyakoreshwaga kera”.

Ati "Bakimara kugenda narabakurikiye, ngeze imbere, nsanga hari n’abandi bamaze kwaka amafaranga, mbabwira kunsiba kuri urwo rupapuro".

Ngizwenayo yakanguriye abacuruzi bagenzi be kwima amatwi bene aba batekamutwe, kandi bagatanga amakuru ku gihe ku babikora.

SP Mbabazi yavuze ko ubwo bafatirwaga mu cyuho bari bamaze kwambura agera mu bihumbi bitatu by’amafaranga y’u Rwanda. Akomeza atangaza ko bene ibi byaha bimunga ubukungu n’igenamigambi bw’igihugu.

Yashimye abaturage batanze amakuru yatumye aba bombi bafatwa kandi abakangurira gukomeza uwo muco mwiza wo kwanga no kurwanya ibyaha no gutanga amakuru ku gihe ku babikora.

Ingingo ya 609 y’igitabo cy’amategeko ahana y’u Rwanda, ivuga ko umuntu wese uhimba cyangwa uhindura mu buryo ubwo ari bwo bwose inyandiko, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, ahanishwa igifungo kirenze imyaka itanu kugeza ku myaka irindwi n’ihazabu y’amafaranga y’u Rwanda kuva ku bihumbi magana atatu kugeza kuri miriyoni eshatu.

Iya 318, ivuga ko umuntu wese, abigiriye kwambura ikintu icyo ari cyo cyose cy’undi, agatuma bakimuha ari uko akoresheje amayeri y’ubwambuzi, wiyitirira amazina atari yo cyangwa imirimo adafitiye ububasha cyangwa agira ngo yizeze icyiza cyangwa atinyishe ko hari ikizaba kibi maze akambura undi imari ye yose cyangwa igice cyayo, ahanishwa igifungo kuva ku myaka itatu kugeza ku myaka itanu n’ihazabu y’amafaranga y’u Rwanda kuva kuri miliyoni eshatu kugeza kuri miliyoni eshanu.

Inkuru dukesha Polisi y’Igihugu