Ibi byabaye kuwa 25/12/2013 ku munsi wa Noheli mu Mudugudu wa Karambi mu Murenge wa Busengo ubwo uwo mwana yasangaga nyakwigendera mu kabari amusaba ko amuha ku nzoga yanywaga maze arabyanga.

Nk’uko Uwineza Marie Alice, Umunyabanga Nshingwabikorwa w’Akagali ka Byibuhiro abitangaza, ngo yahise amutera icyuma mu nda yari yitwaje, bahita bamujyana ku Kigo Nderabuzima cya Busengo, basanga birenze ubushobozi bwabo bamwohereza ku Bitaro bya Nemba birangira bamujyanye i Kigali.

Ngo bagerageje gukurikirana kugira ngo bamenye niba nta kindi bapfaga, bigaragara ko ntacyo uretse urugomo.

Nyir’ugukora icyaha yatawe muri yombi ariko kuko akiri umwana utagarageza ku myaka y’ubukure akaba atafungwa usibye kumujyana mu kigo ngororamuco, Polisi yaramurekuye kugeza ubu yari akiri hanze.

Cyakora, umuryango we wategetswe gufasha Abarame kwivuza; nk’uko Umuyobozi w’akagali yakomeje abitangaza.

Uyu muyobozi yavuze ko bahumurije umuryango wa nyakwigendera, ariko uwakoze icyaha aracyashakishwa, bakeka ko yaba ari mu Mujyi wa Musanze.

Nshimiyimana Leonard