Umurambo wa nyakwigendera wasanzwe mu kagari ka Gikombe mu murenge wa Mataba, bikaba bicyekwa ko yishwe mu ijoro ryo kuwa 12/09/2015 ubwo yari avuye mu kabari atashye.

Bizimana asanzwe akora ubucuruzi bwo kugura inka akazisubiza. Nyuma yo gushaka inka zo kugurisha ku manywa yo kuri uyu wa 12/09/2015 akazibura, ngo yahise yerekeza mu kabari ari naho yiswe avuye.

Uwitwa Habimana yabwiye Kigali Today ko urupfu rwa nyakwigendera rwamenyekanye biturtse ku muntu basanzwe bakorana ubucurizi wagiye kumureba iwe mu gitondo akamubura, nibwo yagiye kumushaka akagwa ku murambo we hafi y’urugo rwe.

Gusa ngo nta kibazo nyakwigendera yagiranaga n’abaturanyi ku buryo cyari kuba intandaro y’urupfu rwe. Cyakora bakekako abamwishe bamujijije amafaranga yari afite kuko mu gihe yabaga agiye kugura inka yabaga afite amafaranga agera muri miriyoni ebyiri.

Mu murenge wa Mataba hakunze kugaragara ubwicanyi bwa hato na hato kuko nko kuwa 06/08/2015 nabwo hishwe umugore witwa Mutuyimana Theophilka atemaguwe, bigacyekwa ko nawe bamujijije amafaranga kuko yagurizaga abantu amafaranga bakazamwungukira.

Umunyamabanga Nshingwabikorwa w’umurenge wa Mataba Nizeyimana Emmanuel avuga ko ubwicanyi bukunze kuhakorerwa bidaterwa n’uko amarondo adakorwa ahubwo abaturage bazi aho akorerwa gusa ngo abantu bakwiye kumenyera gukorana n’ibigo by’imari.

Ati “Abantu bagomba gutangira kumenya no gukorana n’ibigo by’imari aho kugirango birirwe bazererana amafaranga kuko uretse no kuyamwiba akaba yayazira ashobora no kuyata”.

Inama y’umutekano yaguye y’akarere ka Gakenke yabaye muri kino cyumweru yasabye ko amarondo yakazwa kugira ngo barusheho guhangana n’abitwikira ijoro bagakora ubugizi bwa nabi.

Abdul Tarib