Byumba: Umunyeshuri wigaga gutwara imodoka yagonze umwana ahita apfa

16-02-2014 - 10:03' | Ibitekerezo ( 1 )

Mu murenge wa Byumba mu mudugudu wa wa Rugarama, akagari ka Nyarutarama, mu karere ka Gicumbi habereye impanuka y’imodoka yo mu bwoko bwa Toyota Collola RAA 316 ya Auto Ecole la Naissance igonga umwana ahita apfa.

Umunyeshuri wigaga gutwara imodoka muri Auto Ecole La Naissance mu karere ka Gicumbi yagonze umwana witwa Irakoze Pascal w’imyaka 5 ahita apfa kuwa 14/2/2014 mu murenge wa Byumba mu karere ka Gicumbi.

Umunyamabanga nshingwabikorwa w’umurenge wa Byumba, Ngezahumuremyi Theoneste, atangaza ko muri uko kwiga bagiye mu muhanda maze kubera uburangare ndetse n’ubumenyi buke bw’uwari utwaye bahise bakora impanuka bahita bagonga umwana.

Uwo munyeshuri wigaga gutwara imodoka hamwe n’umwarimu wamwigishaga (bose bafite imyaka 20) ubu bafungiye kuri sitasiyo ya polisi ya Byumba naho umurambo wa nyakwigendera ukaba wahawe ababyeyi be ngo bawushyingure.

Ernestine Musanabera