Umuvugizi wa Polisi mu Ntara y’Amajyaruguru, Spt. Semuhungu Christophe yatangarije Kigali Today ko mu bitabye Imana bane harimo n’abana babiri bahise bajyanwa ku Kigo Nderabuzima cya Gahunga naho abakomeretse bose barakurikiranwa n’abaganga ku Bitaro bya Ruhengeri.

Iyi mpanuka yabaye mu masaha ya saa tanu amateraniro y’ubunani arimo, ngo urukuta rw’urwo rusengero rwari rucyubakwa rwagwiriye abakirisitu. Icyateye iyo mpanuka kugeza ubu nticyiramenyekana.

Supt. Semuhungu agira ati “Mu by’ukuri ntituramenya impamvu, rwari urusengero rukiri rushyashya kandi rwubakishije amatafari ahiye, turacyarimo gushaka abahanga mu by’inyubako kugira ngo baturebe icyaba cyabiteye”.

Umuvugizi wa Polisi akaba n’Umugenzacyaha mukuru mu Ntara y’Amajyaruguru ariko akeka ko byaba byatewe n’imvura imaze iminsi igwa inyagira ibyo bikuta amazi agatuma byoroha bikagwira abantu.

Uretse iyo mpanuka yabaye uyu munsi, ubundi ngo iyi minsi mikuru yari irangiye amahoro nta kibazo cy’umutekano muke gikomeye kigaragaye mu Ntara yose y’Amajyaruguru ndetse n’impanuka z’ibinyabiziga; nk’uko Spt. Semuhungu yakomeje abitangariza Kigali Today.

“Icyo tubwira abantu muri rusange bubaka by’umwihariko ku nyubako zihuriramo abantu benshi mu by’ukuri bakwiye kwirinda kujya mu nzu nini nk’urusengero zitararangira, bakabanza bakubaka urusengero cyangwa inzu ikarangira none ukabone kuyijyamo. Ikindi ni ugushaka abantu basobanukiwe iby’ubwubatsi (engineers) bakabanza gukora inyigo,” Spt. Semuhungu.

Muri Nzeri 2013 muri ako Karere ka Burera mu Murenge wa Cyeru, impanuka nk’iyi yahitanye na none abakirisitu umunani, abandi 11 barakomereka.

Nshimiyimana Leonard