Bamwe mu baturage mu mudugudu wa Ngando akagari ka Hehu ahakuwe ibirayi batangarije Kigali Today ko ubwo babyukaga mu gitondo cya kare babonye abasirikare ba Kongo bikoreye ibirayi bamaze gukura mu mirima yabo yegereye umupaka wa Kongo.

Mpaye, umwe mu babyiboneye avuga ko abasirikare ba Kongo basanzwe bakuza ibirenge ibirayi biri mu mirima y’Abanyarwanda yegereye umupaka ariko ngo kuri uyu wambere taliki ya 28/4/2014 abasirikare babyirayemo bakura aharenga uburebure bwa metero eshanu ndetse babyikorera bareba bahita bajya mu mazu yabo.

Mpaye abajijwe niba nta nzego z’umutekano z’u Rwanda zihakorera avuga ko zihari ariko ahakuwe hegereye utuzu abasirikare ba Kongo babamo kuburyo nta buryo bwo kubahagarika.

Ibirayi byakuwe abaturage bavuga ko bigera ku biro ijana, bakaba bavuga ko bahangayikishijwe n’ibi bikorwa by’ubujura bisanzwe bijyana n’ibikorwa by’ihohoterwa abasirikare ba Kongo bakorera Abanyarwanda bajya gukorera muri Kongo.

Kuri uyu wambere muri Kibumba territoire ya Nyiragongo habyukiye imyigaragambyo yo kwamagana ifatwa ry’umuyobozi waho, wahagaritswe azira amakosa yakoze.

Abanyarwanda begereye umupaka wa Kongo batangarije Kigali Today ko iyi myigaragambyo ijyana no guhohotera Abanyarwanda bajya gukorerayo kuko n’amashuri bayahagaritse.

Umuyobozi w’umurenge wa Bugeshi, Mvano Etienne, avuga ko abaturage batagomba kwambuka mu gihe muri Kongo hari ikibazo naho ku kibazo cy’ibirayi bikurwa n’abasirikare ba Kongo, akavuga ko ari ibikorwa by’ubujura bakorera aho begereye kandi bitakoroha kubahagarika.

Sylidio Sebuharara