Niyigena atangaza ko moto ye ifite numero iyiranga RC 619W yibiwe mu Karere ka Gasabo mu Murenge wa Kimironko ahitwa kwa Mushimire ku isaha ya saa moya z’umugoroba zo kuwa 13/12/2014, ubwo bayakaga umumotari wayitwaraga witwa Habinshuti Olivier.

Yagize ati “uwo mumotari yatezwe n’umukobwa amubwira ko ashaka ko amugeza kwa Mushimire arahamugeza, agiye kubona abona umuntu araje aramubwira ngo namujyane kwa Lando mu gihe barimo kumvikana amafaranga haza umuntu aba amuziritse urutsinga mu ijosi baramuniga ahita yikubita hasi bahita batwara moto ubwo atabaje asanga barenze”.

Kuva ubwo Niyigena yatangiye gushakisha moto yitabaza polisi, kubera ko polisi y’u Rwanda ifitanye umubano mwiza na polisi y’u Burundi bakomeje gukorana nibwo moto yaje gufatirwa muri Komine Bugabira mu Ntara ya Kirundo mu Gihugu cy’u Burundi.

Umuyobozi wa sitasiyo ya polisi ya Nyamata mu Karere ka Bugesera, CIP Issa Bacondo avuga ko iyo moto yafashwe kubera ko polisi z’ibihugu byombi zihuriye muri polisi mpuzamahanga (Interpol).

Ati “aha niho habaye igikorwa cy’ubufatanye maze tubasha gutahura aho iyo moto iri, kandi ubwo bufatanye butabayeho ntitwabishobora kuko iyo igeze mu gihugu cy’u Burundi bahita bayiha ibindi byangombwa ku buryo utabasha kuyimenya”.

Uyu muyobozi asaba abamotari kwitwararika kubo batwara ku buryo babonye uwo batizeye bagomba kuzajya babimenyesha polisi byihutirwa.

“Ikindi bagomba kureba aho bageza abo batwaye kuko bagomba gushishoza niba uwo batwaye ababwiye ngo abageze ahatabona kandi hari ahari amatara bakanga kuko ariho bahurira nibyo bibazo byose,” CIP Bacondo.

Akomeza ashimira ubufatanye bukomeje kuranga polisi y’u Rwanda n’iy’u Burundi kuko butariho abo banyabyaha batamenyekana, dore ko uwafatanwe iyo moto yahise afatwa kugira ngo atange amakuru kuri ubwo bujura.

N’ubwo ashyikirijwe moto imwe, Niyigena avuga ko hari indi moto nayo yibiwe ku Kicukiro nayo yo mu bwoko bwa TVS RC 555V yabuze kuwa 11/8/2014, kuri ubu akaba akirimo kuyishakisha.

Egide Kayiranga