Bamwe mu bafashwe batari bagendanye ibyangombwa byabo baje kurekurwa nyuma y’aho imiryango yabo ibibazaniye ndetse n’abakuru b’imidugudu bakagaragaza ko bazwi mu batuye umudugudu.

Umunyamabanga nshingwabikorwa w’umurenge wa Nyamata, Jacques Gashumba, avuga ko abafashwe badafite ikibaranga bakaba batanazwi mu midugudu barimo Abarundi bagomba gusubzwa iwabo.

Yagize ati « abo Barundi batawe muri yombi nta byangombwa bafite bibaha uburenganzira bwo kuba mu Rwanda cyangwa se ikindi cyangombwa kigaragaza uko bambutse umupaka, ubu abo bagiye gushyikirizwa igihugu cyabo».

Avuga ko kandi mubafashwe harimo abava mu bice binyuranye by’igihugu kandi bakaba badafite ikintu na kimwe kibaranga ndetse nta nubazi mu mudugugudu.

«Nyuma yo gusuzuma no kubaririza amakuru atandukanye yabo batawe muri yombi ubu dusigaranye abantu 69, tugiye kureba uburyo tubasubiza iwabo kuko harimo ab’i Huye, Rubavu, Rwamagana Nyaruguru n’ahandi»; Gashumba.

Mu bafatiwe mu nzererezi harimo ib’igitsina gore bane baturutse mu tundi turere . Mu bikorwa by’ubujura mu mujyi wa Nyamata, usangamo kenshi abimukira baba badafite n’ibyagombwa.

Polisi ikaba isaba abaturage kugenda bitwaje ibibaranga ndetse bakishimisha batabangamiye bagenzi babo muri ibi bihe bisoza umwaka.

Egide Kayiranga