Izi modoka zifite agaciro ka miliyoni 195Frw, zamurikiwe abaturage kuri uyu wa gatandatu taliki 24 Ukwakira 2015, mu muhango wayobowe na Minisitiri w’Ubutegetsi bw’igihugu, Francis Kaboneke.

Imodoka zizifashishwa mu gucunga umutekano no kunoza isuku.

Imirenge yiguriye imodoka ni Gisozi, Rusororo, Jabana, Kimironko, Gikomero, Gatsata, Kacyiru, Ndera na Remera hakiyongeraho Kinyinya, ari na yo yabanje, abandi bakayireberaho.

Umuyobozi w’Akarere ka Gasabo Rwamurangwa Steven, yavuze ko umutekano ari wo uza imbere y’ibindi ari yo mpamvu abaturage bihitiyemo kiriya gikorwa cy’ingirakamaro.

Yagize ati “Iki gikorwa tugezeho ni igitekerezo cy’abaturage bakaba ari na bo biguriye izi modoka nta mafaranga yandi avuye mu ngengo y’imali y’akarere atanzwe.”

Umuyobozi w’Akarere ka Gasabo asobanura akamaro ka ziriya modoka.

yakomeje avuga ko ari ibyo kwishimira, akanakagurira n’indi mirenge kurebera ku yabanje bityo ikibazo cy’umutekano kikava mu nzira.

Uwimbabazi Georgette, Umunyamabanga nshingwabikorwa w’Akagari ka Nyarutarama mu murenge wa Remera, avuga ko iriya modoka ije ari igisubizo.

Ati “Ubundi twajyaga tugira ikibazo cy’umutekano nijoro tugahamagaza imodoka ku karere ikatugeraho yatinze cyane kuko yabaga ikenewe henshi bigatuma wenda niba ari umujura irondo ryafashe yaricika.”

Yavuze ko ubwo babonye iy’umurenge byoroshye cyane, ikazaborohereza gucunga umutekano cyane uw’ijoro mu gutwara irondo ndetse no kugeza kuri Polisi abanyabyaha baba bafashwe.

Munyantore Jean Claude