Byabaye kuri uyu wa 09 Ugushyingo 2015, mu Mudugudu wa Ninzi mu Kagari ka Ninzi mu Murenge wa Kagano, nyuma y’uko iyi mbwa ya Ndizihiwe iriye umugore ku ikamukomeretsa cyane.

Abaturage baturanye na Ndizihiwe Canisius bavuga ko nta muntu upfa kunyura ku rugo rwe kuko imbwa ye igira amahane cyane ikaba imaze kurya abantu batatu, nyamara ubuyobozi ntibugire icyo bubikoraho.

Umwe muri bo yagize ati “Iyi mbwa ye ikomeje kudutera inkeke, ntituzi niba inakingiye kugeza ubu imaze kurya abantu batatu, nyamara ubuyobozi ntacyo bwari bwakabikozeho”.

Umunyamabanga Nshingwabikorwa w’Umurenge wa Kagano, Niyitegeka Jerome, avuga ko bibabaje kuba hari abaturage bagifite imbwa ntibazishumike, zigahora zizerera zikarya abantu.

Akomeza avuga ko Ndizihiwe yatawe muri yombi kubera uburangare bwe , agasaba n’abandi baturage kubyitwararika kandi bagakingiza imbwa zabo.

Agira ati “Yashyikirijwe inzego zibishinzwe kuko bigaragara ko ari uburangare yagize. Twaramwihangangirije ngo azirike imbwa ye,ubwo yaryaga umuntu wa kabiri, ntabwo twarebera kandi imbwa ye iri gushyira mu kaga ubuzima bw’abaturage”.

Niyitegeka avuga ko hagitegerejwe impapuro zerekana niba iyi mbwa yariye umugore w’umuturanyi wa Ndizihiwe ku buryo bukomeye ku maguru, yaba ikingiye.

Uwariwe n’imbwa, we kuri ubu arimo kuvurirwa mu Bitaro bya Kibogora, mu gihe Ndizihiwe agifungiye kuri Polisi ya Kagano.

Umugwaneza Jean Claude