KT TV
Abofisiye bo mu mutwe udasanzwe basoje imyitozo yo kurwanya iterabwoba
Abofisiye n’abandi basirikare bafite andi mapeti bo mu mutwe udasanzwe (Special Operations Force), mu Ngabo z’u Rwanda kuri uyu wa Gatanu basoje imyitozo y’ibanze yo kurwanya iterabwoba bari bamazemo ibyumweru 22, yaberaga mu Ishuri Rikuru rya Gisirikare rya Gako.
Umuhango wo gusoza ayo mahugurwa wayobowe n’Umugaba Mukuru w’Ingabo zirwanira ku butaka, Maj Gen Vincent Nyakarundi, wari uhagarariye Umugaba Mukuru w’Ingabo z’u Rwanda, witabirwa kandi n’abasirikare bakuru n’abandi bofisiye bo mu Ngabo z’u Rwanda.
Ni imyitozo yateguwe igamije kongerera ubushobozi mu mikorere abasirikare ba RDF (Special Operations) binyuze mu kubaha ubumenyi buhanitse mu by’imikorere ya gisirikare n’ubumenyi ngiro bukenewe mu guhangana n’ibibazo by’umutekano bigenda bivuka hirya no hino.
Yari igamije kandi kubongerera ubushobozi bwo guhangana n’ibitero by’iterabwoba, ndetse n’ibikorwa by’ubutabazi birimo no kurokora ababa bafashwe bugwate n’imitwe y’iterabwoba.
Maj Gen Vincent Nyakarundi yashimiye abahaye aba basirikare imyitozo ku bwitange n’ubunyamwuga bagaragaje mu gutanga amasomo azafasha kongerera ubushobozi abasirikare ba RDF.
Yanashimiye abasoje iyi myitozo ku myitwarire myiza bagaragaje no kuba barabashije gusoza neza iyo myitozo ikomeye, ndetse bakunguka ubumenyi n’ubushobozi bw’ingenzi buzabafasha mu butumwa bazahabwa mu gihe kiri imbere.
Ibitekerezo
Ohereza igitekerezo
|
|
