Taliki ya 17/6/2014 nibwo abarobyi b’Abanyekongo bafatiwe mu mazi y’u Rwanda barobesha inshundura zitemewe gukoreshwa mu Rwanda, cyakora bamwe mubarobyi bavugana n’ibitangazamakuru byo muri muri Kongo bavuga ko bafashwe n’abashinzwe umutekano w’u Rwanda bakorera mu mazi mu kiyaga cya Kivu ngo babasanze mu mazi kandi nta mupaka uhari kuburyo bamenya niba bari mu Rwanda cyangwa bari muri Kongo.

Nyuma yo kugezwa imbere ya polisi, umuyobozi w’akarere ka Rubavu Bahame Hassan avuga ko abarobyi b’abanyekongo bafashwe bigishijwe kutarengera imbibe z’igihugu kugira ngo batazongera kugwa mu makosa.

Ati “abarobyi b’abanyekongo barafashwe kugira ngo babazwe impamvu barengera imbibe z’u Rwanda, kuko bavuye mu mazi yabo bagera hafi ya Karongi, ntabwo inzego z’umutekano zari kurebera zarabafashe zirababaza kandi barigishwa bararekurwa kandi twizera ko bitazasubira.”

Si ubwa mbere abarobyi b’abanyekongo bafatirwa mu Rwanda kuko mu kwezi kwa Werurwe hari hafashwe n’abandi barengereye amazi y’u Rwanda barobesha inshundura zitemewe gukoreshwa mu Rwanda.

Abarobyi bo muri Congo ngo baza mu gice cy’u Rwanda bakurikiye ubwinshi bw’amafi bafata bakoresheje inshundura zitemewe mu Rwanda ziroba amafi menshi aba akiri mato.

Sylidio Sebuharara