Ni nyuma y’uko hafashwe Abagande bane batwikaga amakara mu biti by’imikinga bikikije umugezi w’Umuvumba, kuri uyu wa 30 Nyakanga bakaba bashyikirijwe Guverinoma ya Uganda.

Aba bagande bafashwe n’umunyamabanga nshingwabikorwa w’umurenge wa Rwempasha ku munsi w’umuganda usoza ukwezi kwa Nyakanga, bakaba bari bamaze gukora ibirundo bibiri by’ibiti bitegura gutwika bafite n’ikindi cyendaga gushya.

Aba bagabo bane bo bavuga ko atari bo batemye ibi biti kuko ngo icyo bakora gusa ari ukugura amakara abivamo.

Nk’uko byumvikanye mu kiganiro hagati y’umunyamabanga nshingwabikorwa w’umurenge wa Rwempasha n’inzego z’umutekano ku ruhande rwa Uganda mu muhango wo guhererekanya aba bafashwe bangiza ibiti by’imikinga mu Rwanda, ngo iki ki nimwe mu bikunze kuganirwaho mu nama zibahuza hagamijwe kunoza imikoranire cyane mu by’umutekano.

Iri rero ngo ni ishyirwa mu bikorwa ry’imyanzuro ifatirwa mu nama zibahuza.

Gakuru James, umunyamabanga nshingwabikorwa w’umurenge wa Rwempasha avuga ko aba bashyikirijwe Leta ya Uganda nyuma y’ibiganiro bagiranye n’ubuyobozi bw’igomborora ya Ngoma muri District ya Ntungamo nk’uko bisanzwe aho bahererekanya abakoze ibyaha ku mpande zombi bagakurikiranwa n’amategeko agenga buri gihugu.

Ashingiye ku kamaro k’ibi biti by’imikinga haba mu kubungabunga umugezi w’Umuvumba no gutanga umwuka mwiza ku baturiye iki gishanga, Gakuru James arashishikariza inzego zose z’ubuyobozi kugera ku muturage kubungabunga ibiti bikikije Umuvumba.

Ikindi kigaragaza agaciro gahabwa ibiti by’imikinga bikikije umugezi w’Umuvumba ni ukuba mu gutunganya iki gishanga gihinzwemo umuceri, ibi biti bitararanduwe byose.

Guhererekanya aba bakekwaho icyaha cyo kwangiza ibi biti kwaherekejwe n’inyandiko iriho urutonde rw’abafashwe nk’ikimenyetso cy’uko Uganda ibakiriye ikaba yashyizweho umukono na Babagye John na Twesigye Herbert bashinzwe umutekano ku ruhande rwa Uganda.

Dan Ngabonziza