Abagabye icyo gitero ariko ntibyabahiriye kuko 19 muri bo bahasize ubuzima, abandi batanu bagafatwa mpiri.

Abasore bari hagati y’imyaka 20 na 30 barimo batatu bari bambaye imyenda ya gisivili n’abandi babiri bari bambaye imyenda isa n’iyigisirikari cyo muri Kongo Kinshasa bavuga ko bakomoka mu turere dutandukanye tw’u Rwanda ari two Burera, Musanze, Kirehe, Gisagara n’undi uvuga ko aturuka muri Kongo.

Bavuga ko bagabye iki gitero baturutse mu mashyamba ya Kongo Kinshasa mu mitwe yitwara girikare irimo n’uwiterabwoba wa FDLR.

Aba bari mu maboko y’inzego zishinzwe umutekano ubwo berekwaga itangazamakuru baritangarije ko binjiye mu mitwe yitwara gisirikari ibarizwa muri Kongo (DRC) hagati y’umwaka wa 2018 na 2019.

Bavuga ko bavuye mu mashyamba ya Kongo Kinshasa binjirira mu birunga ku ruhande rw’u Rwanda bagamije guteza umutekano muke no gufata ubutegetsi.

Umwe muri abo bicanyi yabwiye itangazamakuru ko yitwa Hakizimana Emmanuel akaba ngo avuka mu Karere ka Kirehe.

Yagize ati: “Abari batuyoboye baduhaye amabwiriza yo kwinjira mu gihugu tunyuze mu birunga, tugahangana n’abasirikari tugafata ubutegetsi. Abadushoye muri uru rugamba bari batwijeje ko niturutsinda hari ibihembo biduteganyirijwe birimo amazu meza, amafaranga, imodoka nziza kandi zihenze n’ibindi”.

Uyu yitwa Habumukiza Théoneste. Avuga ko yarangije muri Kaminuza i Butare ajya gukomereza icyiciro cya gatatu (Masters) muri Kaminuza ya Makerere muri Uganda

Aba barwanyi bavuga ko bateye ari 45 bafite imbunda 38. Habumukiza Théoneste ni umwe muri bo wanarangije muri Kaminuza y’u Rwanda mu mwaka wa 2016 agahita ajya gukomereza icyiciro cya gatatu cya kaminuza (Masters) muri Kaminuza ya Makerere mu gihugu cya Uganda. Habumukiza avuga ko yari yinjiriye mu mutwe wa FDLR RUD-Urunana akaba yari awumazemo amezi ane.

Ngo bagabye iki gitero bayobowe n’uwo bakunze kwita Gavana. Yagize ati: “Twahagurutse hari ku cyumweru gishize turi 45 tugera ku butaka bw’u Rwanda mu birunga ku wa gatanu. Twari twitwaje amasasu ntamenya umubare n’imbunda 38. Ubwo twinjiraga mu birunga, uwitwa Gavana ni we wari utuyoboye. We n’abandi navuga ko bamazemo imyaka myinshi ni na bo bari bafite ibyuma n’izindi ntwaro bifashishaga bica abantu. Twari twahawe amabwiriza yo gufata igihugu kuko n’abayobozi bacu batubwiraga ko bari basenze Imana ikababwira ko yakitugabije ari icyacu”.

Aba barwanyi uko ari batanu bafatiwe ahantu hatandukanye mu mirenge ya Kinigi, Nyange na Busogo mu mukwabu wo kubahiga wakozwe ku bufatanye n’abaturage, inzego za Polisi, Igisirikari n’iperereza.

Icyo gitero cyagabwe mu ijoro ryo ku wa gatanu tariki ya 4 Ukwakira 2019 cyahitanye abantu 14 mu tugari twa Kaguhu mu Murenge wa Kinigi no mu Kagari ka Kabazungu mu Murenge wa Musanze.

Abo barwanyi bishe abaturage babasanze mu ngo zabo abandi babasanga muri centre yitwa mu Kajagari babicisha udufuni, amabuye n’izindi ntwaro gakondo.

Aba bakekwaho ubugizi bwa nabi ngo binjiye muri FDLR banyuze muri Uganda

Abaganiriye na Kigali Today bagera kuri bane muri aba barwanyi bayitangarije ko binjiye muri FDLR mu bihe bitandukanye babanje guca mu gihugu cya Uganda.

Bamwe muri bo ngo bari bijejwe kujya gukora akazi kabahemba neza muri icyo gihugu, abandi bagiyeyo mu rwego rwo kugashaka.

Habumukiza Théoneste akomeza agira ati: “Ubwo nari maze amezi atandatu niga icyiciro cya gatatu cya Kaminuza muri Makerere, naje guhura n’umuntu w’umukire anyizeza kujya nkora akazi ko gucuruza amabuye y’agaciro i Walikale muri Kongo ambwira ko nzajya mpembwa neza. Twarajyanye tugezeyo mba nisanze nageze mu mutwe wa FDLR RUD-Urunana. Kuva icyo gihe bahise bamfatirana bambwira ko ngomba kubakorera. Sinigeze mbasha kuhivana ngo mbashe gusubira inyuma, na bagenzi banjye bagiye babigerageza bahitaga bicwa”.

Uyu witwa Hakizimana Emmanuel na we ni umwe mu bagabye icyo gitero akaba yafashwe n’abaturage

Hakizimana Emmanuel na we avuga ko yagiye muri FDLR abanje kwinjirira mu gihugu cya Uganda aho yari agiye gushaka akazi. Yaje kuhahurira n’undi muntu avuga ko yitwa Kabera amubwira ko bajyana muri Kongo kuhakora iby’ubucukuzi bw’amabuye y’agaciro aza kwisanga yageze muri FDLR.

Yagize ati: “Nagiye muri FDLR mvuye muri Uganda, uwanjyanyeyo yambwiraga ko tugiye muri Kongo kuhakora iby’ubucukuzi bw’amabuye y’agaciro, sinashoboraga kuvuga ngo nsubire inyuma kuko iyo ubigerageje abo muri uwo mutwe bakwica. Mu by’ukuri ntitwari tubayeho neza na gato, kuko turya nabi, ibyo kwambara ntabyo. Kuri njye kuza gutera umutekano mucye mu gihugu byari amaburakindi no kuba nta kundi nagombaga kubigenza ngo mbacike”.

Aba bavuga ko muri Kongo Kinshasa babarizwaga mu gace kitwa Binza i Rutshuru. Mu bahungabanyije umutekano mu gitero cyahitanye abaturage ngo barimo abarwanyi bo mu mutwe w’iterabwoba wa FDLR RUD-Urunana, RNC, na FDLR Foca. Aba bose uko bafashwe bakaba nta byangombwa bibaranga bari bafite.

Inzego z’umutekano zikomeje gushakisha abandi baba baragize uruhare muri icyo gitero, ari nako zikomeza gukaza umutekano mu bice bitandukanye by’igihugu.

MENYA UMWANDITSI

Ishimwe Rugira Gisele

Umunyamakuru

Reba inkuru zose nanditse ( 1068 )