Habumuremyi yapfiriye mu bitaro bya Mutorere muri Uganda tariki ya 16/01/2012, nyuma y’uko mu minsi itatu yabanje yari yateraguwe ibyuma mu mutwe n’abagizi ba nabi ubwo yari muri Uganda.

Otim avuga ko nyuma y’iperereza Polisi ya Kisoro yakoze, basanze ukekwaho kwica Habumuremyi yitwa Nizeyimana Moses. Tariki ya 27/01/2012 bahise bamujyana imbere y’ubucamanza ahamwa n’icyaha cyo kwica.

Otim yakomeje avuga ko Nizeyimana amaze guhamwa n’icyo cyaha bahise bajya kumufunga. Yongeyeho ko kuri uyu wa Gatanu aribwo Nizeyimna yagombaga gukatirwa n’ubutabera.

Otim yabitangaje mu biganiro byahuje abayobozi b’akarere ka Burera mu Rwanda n’ab’akarere ka Kisoro muri Uganda. Ibyo biganiro byabereye mu murenge wa Cyanika mu karere ka Burera tariki ya 10/02/2012.

Ibyo biganiro bikaba byari bigamije kureba uko umutekano uhagaze hagati y’utwo turere twombi duhana imbibi, aho dutandukanywa n’umupaka wa Cyanika. Nyuma y’ibiganiro basanze umutekano muri rusange uhagaze neza, bemerenywa gukomeza kuwubungabunga.

Norbert Niyizurugero