Izi nka akenshi zitwarwa mu mamodoka yo mu bwoko bwa FUSO usanga ari nyinshi mu modoka ziryamanyeho, izindi zakomeretse. Hari abavuga ko hakwiye kugenwa umubare ntarengwa w’inka zigomba kugenda muri buri modoka, bitewe n’ingano yayo.

Tariki 22/08/2013, imbere y’akarere ka Rulindo hafatiwe imodoka yo mu bwoko bwa DYNA yari ipakiye inka izijyanye i Kigali. Iyi modoka ikaba yafashwe n’abapolisi bashinzwe umukano wo mu muhanda kubera uburyo yari ipakiye inka zirenze ubushobozi bwayo.

Umushoferi wari utwaye iyi modoka , ari kumwe na nyiri izi nka witwa Rwamagaju , wavugaga ko yari azijyanye kuzigurisha Nyabugogo mu ibagiro,bakaba bategetswe kuzipakurura bakazigabanya kugira ngo zibone uko zigenda zisanzuye.

Uyu Rwamagaju yavuze ko asanzwe atwara inka kandi ngo ku bwe abona nta cyo bizitwaye ,ngo kuko azigeza aho zijya zikiri nzima. Asanga nta kosa afite ryatuma ahagarikwa mu gihe ari mu kazi ke.

Yagize ati “Ubu se ni ubwa mbere ntwara inka i Kigali, jye mbona nta cyo ziba bizitwaye. Ikindi kandi sinakodesha imodoka ingana itya ngo nyitwaremo ubusa, kuko naba mpomba. Jye nta kosa mbona mfite kuko n’ubuyobozi bwampaye ibyangombwa binyemerera kuzitwara.”

Uyu mugabo akomeza avuga ko mbere yo kuzipakira, aba yabanje no kubimenyesha veterineri nawe akabimwemerera.

Twagerageje kuvugana na Veterineri w’aho yari avanye izi nka ntibyashoboka, abapolisi bafashe uyu mucuruzi bakaba bavuze ko iyo bafashe abapakiye inka ku buryo butari bwo, babaca amande ubundi ngo bakabategeka kuzigabanya.

Hortense Munyantore