Hashize igihe abashoferi batwara abagenzi muri imwe mu mihanda yo mu ntara y’Uburasirazuba binubira amande bandikirwa na polisi, ibabwira ko bahagaze ahatemewe kandi ku mihanda nta byapa bihari bigaragaza aho bemerewe guhagarara n’aho batemerewe.

Kuva muri gare y’umujyi wa Kayonza ugera mu ya Kabarondo, hari ibirometero bigera kuri 18, ariko ngo hari ubwo abashoferi babwirwa ko bemerewe gushyiramo abagenzi no kubavaniramo muri gare gusa, bikaba ikibazo ku bagenzi baba bashaka gusigara mu ntera iri hagati y’izo gare zombi.

Umwe mu bashoferi ati “Nta cyapa na kimwe gihari kuva hano(Kayonza) kugera Rusumo. Aho uhagaze hose n’iyo umupolisi asanze washyize imodoka ku ruhande arakwandikira.”

Atanga urugero rw’ibyamubayeho, uwo mushoferi yagize ati “Nk’ubu hari umupolisi wamfashe ambwira ko ahantu ngomba guhagaragara ari muri gare i Kabarondo mvuye i Kayonza. Niba hari umuntu wategeye i Kayonza aviramo mu nzira wamujyana i Kabarondo ute se?”

Aba bashoferi bavuga ko uretse kuba imihanda bakoreraho itagira ibyapa bigaragaza aho bemerewe guhagaragara n’aho batabyemerewe, usanga n’ibimenyetso birimo n’imirongo yo mu muhanda byarasibamye ku buryo aho abapolisi basanze umushoferi ahagaze hose kenshi ngo bamwandikira.

Bifuza ko ahatari ibyapa byashyirwaho kuko bitabaye ibyo bakomeza kubirenganiramo.

Umunyamabanga wa leta ushinzwe ubwikorezi muri minisiteri y’ibikorwaremezo, Dr Nzahabwanimana Alexis avuga ko mu duce dutuwe cyane nta muturage wakabaye arenza metero 500 ataragera ku cyapa ategeraho imodoka.

Avuga ko aho ibyapa bitari ku mihanda yo mu karere ka Kayonza no mu ntara y’Uburasirazuba muri rusange bigomba gushyirwaho.

Ikibazo cyo kutagira ibyapa n’ibindi bimenyetso byo mu mihanda imwe n’imwe y’Uburasirazirazuba kimaze igihe. Byinshi muri byo byagiye bisaza ndetse n’imihanda yangirika ku mpande bituma iba mito ku buryo hari aho ibisikana ry’ibinyabiziga rigorana.

Cyprien M. Ngendahimana