Abazi Hakizimana harimo n’umubyeyi we bavuga ko yari asanzwe agira ibibazo byo mu mutwe, ariko nta muntu uzi niba yaba yariyahuye muri icyo kiyaga cyangwa se hakaba hari abantu bamwishe bakamujugunyamo. Umurambo we wahise ujyanwa ku bitaro bya Rwinkwavu kugira ngo ukorerwe isuzuma hamenyekane icyo yaba yarazize.

Ikiyaga cya Kadiridimba ni kimwe mu tuyaga dutoya mu karere ka Kayonza, ariko gifite amateka asa n’atangaje. Icyo kiyaga gifite ahantu gisohorera amazi agakora umugezi kandi ubwacyo nta migezi myinshi yisukamo ku buryo cyagira amazi ku buryo buhoraho kandi na cyo hari ayo gisohora.

Abatuye i Rwinkwavu bavuga ko nta muntu uzi ubujyakuzimu bw’icyo kiyaga, bamwe bagakeka ko aho kiri haba haratobokeye amasoko ikiyaga kikavuka gityo. Hari n’amakuru avuga ko muri icyo kiyaga higeze kugwamo ikamyo yuzuye inzoga za byeri ikaburirwa irengero hamwe n’umushoferi wari uyitwaye na tandiboyi we.

Umunyamabanga nshingwabikorwa w’umurenge wa Rwinkwavu, Gakire Elias yadutangarije ko nta muntu wemerewe koga muri icyo kiyaga, dore ko hari na bamwe mu bagituriye bavuga ko hafi buri mwaka gitwara ubuzima bw’umuntu.

N’ubwo hataramenyekana neza impamvu y’urupfu rwa Hakizimana, abaturiye Kadiridimba barasabwa kwirinda kuyogamo, cyane cyane ababyeyi bafite abana bagasabwa kubabuza kwegera icyo kiyaga.

Cyprien M. Ngendahimana